Како[2] подобает святителем и священническому и иноческому чину, и царем и князем и всем християном поклонятися образу Спасову и животворящему кресту и пречистой Богородице и святым небесным силам и всем святым и священным[3] сосудом и святым честным мощем[4]. Правая рука устроити персты первый краиней да два нижних концы сомкнуты, ино Святая Троица вообразится, средней перст с другим прямо поставити мало надклонен, а другии повыше, а не разпростерты, ти приобразуют Божество и человечество, тако прекрестити лице свое; первое возложити рука на чело, потом на перси, таж на правое плеще, таже на левое[5] и по существу воображен крест Христов; потом главою поклонитися до пояса; а великий поклон в землю главою, а молитву и моление во устех, а в сердцы умиление и во всех удех сокрушение о гресех, и от очию слезы, а от душа воздыхание: усты Бога слави, а умом и сердцем и дыханием молитися о полезных, рукою перекрестися, а телом поклонися в землю или до пояса, всегда тако твори. А святительскому чину и священническому також рукою прекрестити всякого христианина, требующа от них благословение о кресте Христове, и о воображении и о поклонении во отечнице пишет известно, там почет уразумееши силу креста Христова.[6]
Поучение святого Феодорида, како благословити рукою и перекрестися. Три персты равны имети концы соединены вкупе, по образу Троическу Бог Отец, Бог Сын, Святый Дух не три суть Бози, но един Бог в Троицы имены разделяется Божество едино. Отец не рожден, а Сын рожден, а не создан, а Дух Святый ни рожден ни создан, но исходящ, трие во едином Божестве, едина сила, едина Божества честь, едино поклонение от всея твари, от ангел и человек, тако тем перстом указ, а два перста наклонена, а не распростерта и тем указ тако то образуют, два естества Христова Божество и человечество; Бог по Божеству, а человек по вочеловечению, а по обоем совершен; вышний перст образует Божество, а нижний человечество, понеже сшед от вышних спасе нижняя, чтож согбение толкует перстом преклонь небеса сниде, нашего ради спасения, да тако достоит крестится и благословити: тако святыми отцы узаконено.
О том же Афонасия и Петра Дамаскина.
Яко начертанием честного и животворящего креста отгонимы бывают нечистии беси, и различныя недуги без цены убо и без труда, и похвалу его убо кто может изрещи. Святии отцы предаша нам на сопротив глаголания неверным и еретиком, яко два перста убо а едина рука являет Христа Бога нашего во двою естеству и едином составе позноваема, десница ж неизреченную его силу и одесную отце седение возвещает и свыше наченше и от небеснаго его круга к нам сошествие являет, и паки от десныя страны на левую отгоняти врага являет, яко непобедимою своею силою победи дьявола Господь шуя и мрачна и не крепка.
Примечания[править]
- ↑ Ibid. = образу спасову.
- ↑ Ibid. = тако.
- ↑ Ibid. = освященным.
- ↑ В Пог. Арх. Цар. Болш. здесь идет следующее: И еще должен есть творити кийждо благочестивый христианин крест свой первее убо да совокупит три персты своя за Святую Троицу: великий перст и другие два, сущие близь его. Первее убо да положит ю на челе своем, второе на чреве своем, третье на правом раме и четвертое на левом раме. Егда творит тако, тогда знаменует истинный крест. И слышите кий есть разум креста: егда полагаем руку нашу на челе, та же низводим ю на чрево, хощем рещи: яко Господь наш Иисус Христос Сын Божий, бе и есть Бог; убо нашего ради спасения и да веруем мы в Него, сниде с небес долу, на землю и паки иде дальнейше земли, сии речь: в муку, и свободи тамошния мучимыя души. Егда же паки по сих положим ю на десном раме, та же на левом: хощем рещи, яко, отнеле же свободи души праведных от муки, вознесся на небеса, и седе отдесную Бога и Отца; и паки имать прийти, судья всего мира, поставити праведныя убо одесную Своея страны, грешныя же от левыя; сего ради молим Его, да не поставит нас в левой Своей стране; но да поставит нас стати в десной Своей стране со Святыми. Сие знаменует крест, егда творит и на лице нашем; и сего ради должни есьмы, яко есть лено творити, и да действует и сила его.
- ↑ Ibid. следует продолжение согласное с нашим текстом.
- ↑ Ibid. затем следует окончание главы:
О благословлении архиерейском и священническом: от послания блаженнаго Паисия Патриарха, вопроса 25-го толкование.
О двадесять же пятом еже вопрошаете: которыми персты подобает начертовати Архиерею или священнику благословение, еже дает, глаголет: яко понеже обеща Бог с клятвою Аврааму да благословятся вси языцы в семени его, еже есть Иисус Христос, еже Давид к Мессию вознося глаголет: и да благословятся в Нем вся колена земная: благословляет церковь всех, начертывающи рукою имя Мессиево, еже есть Иисус Христос, изображающи И. И. С. еже есть являет Иис и — Х, И, С.: еже глаголет Хртос, и сие вкратце, и которыми персты начертывает, и то сия письменна четыре ничто же разньствует; токмо да имать мысли благословляй и благословляемый, яко благословление сие сходит от Иисуса Христа рукою священническою, и Иисус Христос, иже дает дарование благословления, к прошению онаго, иже просит и с верою; но пристойнее является, яко же живописуе Христа и благословляет, ибо чище показует, еже Иисус Христос: вторый и третий перста совокупляет, знаменуета Иисус, а первый и четвертый совокупляема, знаменуема Х, и малый и последний С, — еже являюта вкупе Хс.
