Подлинникъ. На оборотѣ адресъ и помѣта: 166 г. іюня въ 4 день съ Стародубцомъ съ Васильемъ Цвиленевымъ,
I. Списокъ съ листа, каковъ писалъ изъ Корца Иванъ Дворецкой въ Кіевъ къ наказному полковнику къ Василью Дворецкому маія въ 19 день, нынѣшняго 166-го году. А въ листу ево написано:
Мнѣ вельце ласковый пане Василѣй Дворецкий, пане дядьку и добродѣю мой великий! Доброго здоровя и на всѣмъ щасливого поваженя одъ Господа Бога вмсти вѣрне заживать зычу, яко добродѣеви своему, и о своемъ здоровю вмсти, добродѣеви моему, ознаймую, жемъ зъ ласки Бога всемогущего здоровъ и во всѣмъ поводѣться мнѣ добре; только неласцѣ ся вмсти дивую, що вмсти добродѣй мой не пишешъ, що ся на Вкраинѣ теперъ поводить, чи безпечно намъ тутъ сидѣть, чи нѣ, — рачъ вмсти, добродѣй мой, презъ купцовъ якихъ-кольвекъ до мене написать и ознаймить, кгдыжъ ѣздять то сюды, то туды. Да вѣдомости вмсти, добродѣеви моему, доношу, же войско Литовское все коло Гореня по мѣстахъ и по селахъ стоять, такъ тежъ и войска коронного корогвей 16 такъ же по Н…рину стоять. Иллинскои допутать(?) послалъ оногда своего челядника до Гощи до Киселихи, жебы кон(ей) 4 на посполитое рушене вин(пра)вила, и до всѣе шляхты писалъ, которая на сѣмъ боку Гарина мѣшк(аеть), жебы тудыжъ ишли, все яко бы зъ нами хотять, будучи въ покою, мѣшкати, а зъ нами бы то змиривши, на Москву хотять ити, а съ Шведомъ еще не скончили—все шальбѣрствомъ! Мѣемъ певную вѣдомость. Притомъ зъ унѣжоными услугами моими яконайпилнѣй отдаюся. Дано съ Корца, майя 12 дня, року 1658-го.
Вмсти добродѣю моему и во всѣмъ повольный слуга Иванъ Дворецкий.
II. Списокъ съ листа, каковъ листъ писалъ гетманъ Иванъ Выговской ко отцу своему Остаѳью Выговскому маія въ 18 день нынѣшняго 166-го году. А въ листу ево написано:
Мости пане ойче и добродѣю мой великий! На поважную барзо вмсти, моего милостивого пана, интерцезия вшиткомъ учинилъ; до того рачещѣ самъ вашмости, мой мостипанъ и добродѣй, вѣдать, же я головнымъ неприятелямъ ласку великую показую, неже бымъ о рѣчъ малую до кого серце тративъ. Отъ стороны тоеи братьи нашои, за ласкою божіею, все добре: присягу намъ такую на ур… но и неразорваную приязнь учинилъ, печатями своими и подписомъ рукъ власныхъ ствердивши на листахъ своихъ, намъ прислали; якая николи еще не была. Самъ ханъ противко ему стари… Колимъ я его виталъ, поднѣсшися на колѣ… рукою своею за глову его поднѣсъ, чего николи ани Польскему послови, ани жадному зъ ыншихъ не освядчалъ теи ре(чи). За ласкою божиею колимъ се южъ черезъ Днѣпръ переправилъ зъ ордою, той неприятель барзо убоялся, и не мало ся тего Пуш(каря) опустивши, мнѣ ся кланяють, яко жъ и… (про)тивко тымъ, кои ся здають тиранско не уставя; а Пушкарь самъ яко… потѣхи не относи, и до конца дас(ть) Господь Богъ не отнесе. А кгды жъ посп(ѣ)емо зъ войсками нашими и ордою з.... Я тылько вашмости, моего мости панства, прошу, въ молитвахъ своихъ родительскихъ не хотѣйте мене запоминать, а т(утъ) цо-кольвекъ будеть и въ часъ дальший, вашмости, моего мостивого панства, увѣдомить не омѣшкаю. А за (тымъ) звыклой ласцѣ родительской себе зъ услугами моими сыновскими на т(ой) часъ пильно залецамъ. Даиъ съ табору на К…шлыку дня 17 майя, року 1658.
Вмс. моего милостивого пана унижон(ый) слуга и сынъ Янъ Выговский гетманъ.
Карачъ-бея въ сороку тысячей до(брои) орды ютро переправи, который одъ мене не пойдуть хоть цѣлый рокъ. Нерод(инъ)-салтанъ
