11. Оуши оуклоняя отъ зла слышания, оумнымь же въиноу прилѣгая къ шюмѣнию стыихъ словесъ, яже въ стыихъ кънигахъ писана соуть:
12. Роуцѣ съгъбенѣ имѣи на събрание зълааго имѣния свѣта сего, простьртѣ же ва приятие оубогыихъ.
13. Не стыдися вьсякомоу съзъданомоу въ образъ божий главы своя покланяти, старѣйшааго дньми почьстити не лѣнися и покоити старость его потъщися.
14. Съверстьникы своя миромь срѣтаи, меньшая себе съ любовию приемли, (пред) честьнѣишимь себе не потроудися стояти.
15. Чядо, не боуди самохотью лишенъ вѣчьнааго житья; грѣха бѣжи, яко ратьника, гоубящаго дшу твою.
16. Не въсхошти веселоватися въ мирѣ семь: все бо веселие свѣта сего съ плачьмь кончаваеться: и се явѣ видѣти въ мирѣ семь въ двоихъ соусѣдѣхъ: оу сихъ сватьбоу творять, а оу другыихъ мьрьтвьца плачються, — тъ же плачь соуетьны: дньсь плачються, а оутро оупиваються.
17. Тѣмь же разоумѣи соуетоу вѣка сего и скоро падоуюштюю плъть нашу: дньсь бо растемъ, а оутро гниемъ.
18. Тѣмь же въ малѣмъ животѣ възишти вѣчьныя жизни, идеже отъ сея жізни нѣсть ни скръби, ни въздыхания, ни плача, ни сѣтования, нъ радость и веселие, свѣтъ немьрьцяя, слънце самъ Господь.
19. Тоу жизнь възлюби, къ той по вся дьни тьштіся и о тои въиноу помышляи.
20. Боуди, ти съпяшту, мысль — възглавие, помыслъ нбсныя радости; въстаюштю же, брашьно — память цѣсарьства небеснаго.
21. Чядо, алчьнааго накръмі, яко же ти самъ Господь повелѣлъ, жадьнааго напои, страньна въведи, больна — присѣти, къ тьмьніци доиди, виждь бѣду ихъ и въздъхни.
22. Боуди ти въ скръбь твою прибѣжиште цркы; паче же и кромѣ скърби, и по вся часы и дьни, въшьдъ, припади къ вышнюоумоу, лицьмь си землю покрыи.
23. И приноуди его поминаати тя, не оуклонить бо ся тебе дшелюбець, члвѣколюбець, но прииметь тя и оутѣшить тя.
24. Црквь же разоумѣваи н(е)бо соуште; олтарь же — прѣстолъ вышьняаго; слоужителя же — агглы бжия: тѣмь же въ цркви, акы
