и возрасту! слышатель, сынове мои, каково гоненіе приспе на вѣру Христову, яко поганый Царь Мамай идетъ на Рускую землю на Великого Князя Дмитрія Ивановича Московскаго, хотят вѣру Христову осквернити и святыя церкви разорити и родъ Христіанскій истребити. Князь ж Великій Дмитрій Ивановичь помощию Господа Бога и Пречистыя Богородицы вооружися противу поганыхъ и хощетъ желанно по Христе пострадати. Молю же вы сыновъ своихъ, подвигнитеся и вы с нимъ Великимъ Княземъ вѣры ради Христовой, да получите вѣчную жизнь во ономъ вѣцѣ!“ Слышавше сие Новгородцы, возглашаше велегласно гласи многими, падше поклонишеся на лицехъ своихъ, Архіепископуж Еуѳимию рѣкуще: „Святый отче, нашъ учитель, ты еси глава всѣмъ намъ, ты еси пастырь словеснымъ овцамъ стада Христова! готови есьмя, святый отче, в день скончашися вѣры ради Христовы, головы своя положити по Христѣ Бозе нашемъ, а не мочно намъ, Господине, оставить Великого Князя Дмитрія Ивановича Московскаго единаго! Аще ли, Господине Великіи, Князь спасенъ будетъ, то и мы с нимъ спасени будемъ. Дай же намъ, Господине отче, днесь собратися! а утре пойдемъ вси на путь спасенія. Архиепископъж. Еуѳиміи отыде отъ нихъ во свояси, они же мужіе великаго Новаграда начаша избирати от вельможъ своихъ воеводъ крѣпкихъ, и выбраша воеводъ крѣпкихъ и мудрыхъ зело: перваго Василія Васильевича Посадника, втораго Ѳому Михайловича Краснаго, третьяго Андрѣя Иванова сына Волосатаго, четвертаго Дмитрія Заверяжскаго, пятаго Пана, шестаго Юрья Хромого и иныхъ многихъ и отрядиша с ними избраннаго Новгородцкаго воинства м тысячъ и заповѣдаша имъ всѣмъ: яко услышатъ за утро колоколъ вѣстный, готовымъ быти всѣмъ на дворище у Святаго Николы. Архіепископъже Еуѳиміи за утро рано восстахъ и повелѣ по заутрени воду святити съ мощей многихъ и бысть яко первый часъ дни, повелѣ звонити Архіепископъ, яко да по тому звону съѣдешца все войско
