По все дни, в вечере, мужу с женою, и с детми, и с домочадцы и кто умеет грамоте отпети вечерня, и повечерница, и полунощница с молчанием[2] и с кротостию с стоянием[3], и с молитвою, и с поклоны; — пети внятно и единогласно. А после правила, отнюдь, ни пити, ни ясти, ни молвы творити всегда, а всему тому наук; а ложася спати, всякому христианину по три поклона в землю пред Богом положити; а в полунощи всегда тайно востав помолитися о своем согрешении, елико вместимо; а во утре, воставая, також творити и комуждо противу силы и по желанию, а не праздным[4] женам кланятися[5] до пояса. Всякому ж христианину молитися о своем согрешении и о отпущении грехов и о царе, и о царице и о их чадах, о здравии[6] и о благоверных князех, и болярех, и о христолюбивом воинстве, о помощи на враги о плененных свободе, о святительском и священническом и мнишеском[7] чину и о отцех духовных и о болящих и в темницах заключенных и за вся християны. Жене також молитися о своем согрешении, и о муже, и о чадех, и о домочадцех и о сродницех и о отцех духовных[8]; и по молении сем утре, вставая, отпети заутреняя и часы[9], и молебен, с молитвою и с молчанием и с кротостию и с кроткостоянием и единогласно пети, и со вниманием слушати, и с святым кажение. А где некому пети, ино молитися доволно, в вечере и утре; а мужем отнюдь не погрешати церковнаго пения вечерни и заутрени и обедни[10]; а женам и домочадцем как вместимо, по разсужению в неделю и в праздники и во святыя дни.
Примѣчанія[править]
- ↑ Р. Т. № 38 продолжается та же глава. Конш. гл. XII.
- ↑ Р. Т. № 38 и Конш. и со вниманием.
- ↑ Ibid. = и с кроткостоянием.
- ↑ Цар.= бременным.
- ↑ Ibid. = поклоны класть.
- ↑ Р. Т. № 38 и Конш. и о братии его.
- ↑ Арх. = иноческом.
- ↑ Конш. а мужу тако же.
- ↑ Ibid. а в неделю и в праздник.
- ↑ В Р. Т. № 38 и Конш. здесь оканчивается глава.
