Иоанн егда бе в заточении, во Патмосе же сущ в восхищении.
Слыша убо глас, яко трубу гремящ. Аз есмь начало и конец — ся зовящь.
Повелевающ же к седми писати церквам; зримая от Него послати.
2
Обращся зряше апостол зовуща, виде окрест седмь светилник имуща,
Их же посреди сам звавый стояше, иже яко Сын Человеческ бяше.
Седмь же в деснице звезд зримый держаше. Лице же солнцу подобно имяше.
3
Богослов духом в небо восхищенный зрит престол Божий зело украшенный.
На нем же седящ сардину подобен, иаспису же; Бог сый благороден.
Окрест же его двадесять четыре престоли старцев во небесном мире.
Трисвятое же животна пояху четыре; Ему день и нощь глашаху.
И старцы, венцы положше, взываху поклоншеся; честь, слава — восклицаху.
4
Зрит на престоле Феолог седяща, в руку же книгу с печатми держаща.
Агнца же, яко заколенна суща у седящаго книгу емлюща.
И старцев с гусльми пред агнцем упадшых, фимиамы же, молитвы отдавшых.