Предисловие и начало книги сея, поучение[2] и наказание отец духовных ко всем православным христианам: како веровати Богу[3] и кресту Христову, и небесным силам, и святым мощем покланятися и святым тайнам причащатися[4]. Царя чтити и его князи и вельможи, по апостолу, рекшу: ему же честь честь, ему же дань, — дань, ему же урок, урок. Не туне носит мечь в похвалу добро творящим, безумным же, — в наказание[5]. Аще хощеши не боятися власти, твори всегда добро пред Богом и пред ним; и во всем покорайся им, и право служи и будеши сосуд избран и царьское имя носиши[6]. И как чтити святительский чин, и священнический, и мнишеский и пользоватися от них и молитвы прошати[7] на благословение дома своего, и во всяких вещех душевных и телесных, наиначе[8] же духовных, и с прилежанием внимати и учения их слушати, яко от божьих уст. И еще в сей книге изнаидеши от некоего о мирском строении, како жити православным христианом в миру с женами и детми и и с домочадцы и их наказывати и учити и страхом спасати, и грозою претити и во всяких делех беречи, душевных и телесных, чистым быти. И во всем самому стражу над ними быти, и о них пещися, аки о своих удех. Господу рекшу: «будета оба вплоть едину». Апостолу рекшу: «аще страждет един уд, то все уды с ним страждут»; також и ты не о себе идином пещися, но о жене и о детях своих и о прочих и о последних домочадцех — вси бо есмы связаны единою верою к Богу, и с добрым сим прилежанием имей любовь ко всем, по Бозе живущим, и око сердечное взирающе к Богу, и будеши сосуд избран не себе единого несыи к Богу, но многи, и услышиши добрыи рабе и вѣрныи, буди в радости Господа Бога своего. И еще в сей книге изнаидеши о домовнем строении: как наказ имети к жене, и детем и слугам, и како запас имети всякой хлебной, и мясной, и рыбной, и овощной и дворовой порядне, паче же в недоумеваемых, по главам изнаидеши вся.
Примечания
[править]- ↑ По рукописи Императорской Публичной библиотеки. Древнехранилища Погодина, № 1627.
- ↑ С этого слова начинается 1-ая глава ркси Цар.
- ↑ В предисловии нап. Забелиным Вр. М. Об. И. и Др. 1850 г. кн. VI по ркс. Цар. = во Святую Троицу и Пречистую Богородицу.
- ↑ Ibid. и како прочей Святыни прикасатися.
- ↑ Ibid. на казнь.
- ↑ Ркп. Цар. в себе носи всегда.
- ↑ Ibid. нам, и благословения. Этим оканчивается первая глава ркси Цар.
- ↑ Вероятно, должно быть «наипаче». — Примечание редактора Викитеки.