А у кого дочи родится, ино разсудный отец которым[2] промыслом себя питает, во граде ли куплю деет, или по морю[3], или деревню пашет, и он с торгу, ей выть[4] наименит, а в деревне по тому же или животину ростит ей с приплодом; и от ея выти, что Бог пошлет, купит полотна и ущины[5], ширинки, и убрусы, и рубашки, по всяк год и кладет во причесной[6] сундук, или в коробья: платие, и сажение и маниста[7], и суды оловяные, и медяные, и деревянные; и, прибавливая по немножку всегда, на всяк год, по прежписанному, а не вдруг; ино себе в досаду, а всего, даст Бог будет полно[8]. Ино дочи ростет, и страху Божию, и вежеству всякому, и рукоделию учится, а приданое с нею вдруг пребывает; а как замуж сговорят, и отец, и мати будут безпечалны[9], занеж дал Бог всего у них полно, и в веселии и в радости брак у них будет. Аще ли[10] отец и мати не запасны[11], и своей дочери по прежеписанному не изготовили, и выти ей не в чем не уделивали, и учнут ея замуж давати, и в те поры все покупати; ино скорая женитба ведомая работа, и отец и мати будут в печали о такове браце, занеже все вдруг, и дорого купити. А по судбам Божиим, кая[12] дочи преставится: ино ея наделком поминати и по ея душе сорокоустие[13] или милостыню из того давати; а толко иные дочери есть, такоже и о тех промышляти.
Примечания[править]
- ↑ Конш. глава XVI читается следующим образом: А у кого дочь родится, ино разсудны люди, от всякого приплода на дочерь откладывают, на ее имя, или животинку ростят с приплодом; а у полотен и у вусчин, и у ширинок, и у вубрусов и рубашек, по вся годы ей в пришенной сундук кладут: и платье, и саженные, и монисто и святость, и сосуды оловяные и медные и деревяные; прибавливати не-по-множку всегда, а не вдруг: себе не в досаду, а всево будет полно. Ино дочери растут, а страху Божию и вежству учатся, а приданое с ними вдруг прибывает; и как за муж сговорят, ино все готово. А толко ранее хто о детех не смышляет, да как за муж давать, и в ту пору все покупать: ино скорая женитва видомая работа. А по судбам Божиим толко та дочь преставится, ино ее наделком поминают: по ей души сорокоуст, и милостыню из того дают. А толко иные дочери есть: також о них промышляти.
- ↑ Арх. Болш. Пог. Цар. = торгом.
- ↑ Ibid. плавает.
- ↑ Ibid. какову.
- ↑ Ibid. = усчины.
- ↑ Ibid. = опришенной.
- ↑ Ibid. и святость.
- ↑ Ibid. = много.
- ↑ Ibid. = без печали.
- ↑ Ibid. будут.
- ↑ Ibid. = запасливы.
- ↑ Ibid. = та.
- ↑ Ibid. = сорокоуст.
