Повесть о рязанском епископе Василии
| О граде Мураме и о епископьи его, како преиде на Рязань |
| Дата создания: XVI век. Источник: Повесть о рязанском епископе Василии • РНБ/ Сол. 287/307 /Ермолай-Еразм (книжник; XVI в.) Сборник сочинений. |
О граде Мураме и о епископьи его, како преиде на Рязань
[править]Слышах убо некиа глаголющих древняя сказаниа о граде Мураме, яко в прежняя лета бысть создан не на том месте, идеже ныне есть, но беяше негде в той же области, отстояние же имея немало от нынешняго града. Сказание же о нем, яко преславен град бяше в Росийстей земли во дни древняя. Многим же летом прешедшим, разорися некако и запусте, и потом по многих летех пренесен бысть на ино место вскраи тоя же области и ту поставлен бысть, идеже и ныне есть. Егда же бысть в Киеве и во всей Русии держава превеликаго князя и святаго равна апостолом Владимира, и внегда ему дети своя разделити во одержание градов, предасть сынови своему, рку же святому Борису, в Росийстей земли град Росьтов, и сынови же своему, рку же святому Глебу град Мурам. Ис тех градов бысть по Христе и страдание ею, и якоже святыня ею познана бысть от верных и прославися во святых церквах. И беяху в тех градех одержания их епископи, и нарицахуся тии епископи домовнии святых страстотерпец Бориса и Глеба. Потом же два князи от тогова же сродства святого превеликаго князя Владимира, присная суще себе братиа, начаша державствовати: вящешии во граде Мураме, мнии же в Рязани.
Не в колика же времена бысть во граде Мураме епископ праведен, именем Василие. Сего же добляго жития не терпя враг, иже древний душам разбойник, нача на нь спону творити, яко да прилична его блудному делу сотворити. И воображаяся в девицу, и показуя себе из храмины епископа овогда во оконце его, иногда же преход творя из храмины его. Видевши же се, мног народ соблазнися, такоже и велможа. И приидоша кь епископу в дом, да сея ради вины изгонят и сь епископии.
Епископ же, приим икону образа Божиа превечнаго младенца и Богородична, на нюже имеяше надежу о всяцем спасении своем, и поиде из епископии. Проводиша же его до реки, нарицаемыя Оки, и хотяху дати ему отплути судно мало. Сий же, стоя на брезе, снем мантию и, простре на воду и вступи на ню, нося Божий и Богородичный образы, и абие духом бурным несен бысть со образы противу струям, отнюдуже река течаше. Поведаху же, яко бысть се в третий час дне, и того же дни в девятый час примчан бысть в место, еже ныне зовомо Старая Рязань; ту бо тогда пребываху и князи рязанстии. Князь же рязанский Олег срете и со кресты; и тако пребысть мурамская епископья в Рязани; нарицает же ся и по днесь Борисоглебская.
По сих же паки прият бысть Мурам от рязанских епископов. Сами же к тому в Мурам не возвратишася и нарицахуся епископи преже рязанстии и потом мурамстии. Егда же посещениа ради во град Мурам епископи приход творяху, тогда нарицахуся преже мурамстии и потом рязанстии. Чюдесная же та икона, иже епископа пренесе, и доныне в Рязани есть. Он бо верою упова на ню, сия же милостию удиви, хотя явити без порока своего раба, и вь едину шесть часов премча вверх по реце множае дву сот поприщ. О Пречистая Божиа мати, кий язык исповесть твоя чюдеса или кий смысл по достоянию похвалит твоя благодеяниа, како молиши Сына си со Отцем и со Святым Духом о наших согрешениих! Се бо слыша - не самого зрака твоего, но образа написаннаго каки силы сотвори, ужасает ми ся ум! Хотех бо распространити и не свем, како написати, понеже оттуду уже многа лета преидоша, и аз о сем не добре сведе и боюся, да не явлюся о сем глаголяи ложь. Якоже слышах, тако и написах; аще же нечто и не до конца сведе написах, но имея в помощь исправляющу владычицу всех - Богоматерь, еяже достоит всему християнству безпрестани молити, да избавит ны от навет вражиих всегда, ныне и присно и в веки веком. Аминь.