Послесловие к московскому «Апостолу» 1564 года

Материал из Викитеки — свободной библиотеки
Перейти к навигации Перейти к поиску

Послесловие к московскому «Апостолу» 1564 года
автор Иван Фёдоров
Дата создания: 1 марта 1564 года, опубл.: 1 марта 1564 года. Источник: http://www.spsl.nsc.ru/rbook/Издания%20Ивана%20Федорова/Апостол-московское%20издание/index.html
 Википроекты: Wikidata-logo.svg Данные


Изволением отца, и споспешением сына, и совершением святаго духа. повелением благочестиваго царя и великаго князя ивана василиевича всея великая росия самодержца. и благословением пресвященнаго макария митрополита всея русии. многи святыя церкви воздвизаеми бываху, во царствующем граде москве. и по окрестным местом. и по всем градом царства его. паче же в новопросвещенном месте во граде казани и в пределех его. и сия вся святыя храмы благоверныи царь оукрашаше. честными иконами и святыми книгами, и сосуды, и ризами, и прочими церковными вещми. по преданию и по правилом святых апостол и богоносных отец. и по изложению благочестивых цареи греческих во царе граде царьствовавших, великаго константина, и оустинияна, и михаила и феодоры, и прочих благочестивых цареи, в своя времена бывших. и тако благоверныи царь и великии князь иван василиевич всея русии. повеле святыя книги на торжищих куповати. и в святых церквах полагати. псалтыри, и евангелия, и апостолы, и прочая святыя книги, в них же мали обретошася потребни, прочии же вси растлени от преписующих ненаученых сущих и не искусных в разуме, ово же и неисправлением пишущих. и сие доиде и царю в слух; он же начат помышляти како бы изложити печатныя книги, яко же в грекех, и в венецыи, и во фригии, и в прочих языцех. дабы впредь святыя книги изложилися праведне. и тако возвѣщает мысль свою пресвященному макарию митрополиту всея русии. святитель же слышав зело возрадовася, и богови благодарение воздав царю глаголаше, яко от бога извещение приемшу, и свыше дар сходящ. и тако повелением благочестиваго царя и великаго князя ивана васильевича всея русии, и благословением пресвященнаго макария митрополита начаша изыскивати мастерства печатных книг в лето 61, осмыя тысящи, в 30, е, лето государьства его. благоверный же царь повеле оустроити дом от своея царския казны, иде же печатному делу строитися. и нещадно даяше от своих царских сокровищ делателем, николы чюдотворца гостунского диякону ивану федорову да петру тимофееву мстиславцу на составление печатному делу и к их оупокоению, донде же и на совершение дело их изыде. и первее начаша печатати сия святыя книги, деяния апостольска. и послания соборная и святаго апостола павла послания, в лето 7070, первое, априля, въ, 19. на память преподобнаго отца иоана палеврета, сиречь ветхия лавры, совершени же быша, в лето 7070, второе, марта, въ, 1, день,

при архиепископе афанасие митрополите
всея росия в первое лето святитель
ства его в славу всемо
гущия и живона
чалныя троица
отца и сына
и святаго
духа
.
аминь.