Русская Правда/Сокращённая Русская Правда

Материал из Викитеки — свободной библиотеки
Перейти к навигации Перейти к поиску

Сокращённая Русская Правда : по Толстовскому списку второй половины XVII в.
 Википроекты: Wikipedia-logo.png Википедия


ПРАВДА РУСКАА


1. Аще уб(ь)ет муж мужа, то мстити брату брата, любо отцу, любо сыну; оже ли не будет кто его мстя, то положити за голову 80 гривен, любо разсудити по муже смотря.

О МУЖИ КРОВАВЕ[править]

2. Аще приидет кровавъ муж на двор или синь, то видока ему не искати, но платити ему продажа за безчестие, каков будет; аще не будет на нем знамения, то привести ему видок, слово противу слова.

3. Аще ж ударит мечем или ножем, а не на смерть, то князю вины 9 гривен, а исцу за рану судят.

4. Аще ударит на смерть жердию или попехнет, а знамения нетъ, а видок будет, аще будет болярин или людин или варягъ, крещения не имея, то по их пути платити безчестие; аще видока не будетъ, ити имъ на жребии, а виноватыи в продаже, во что обложат.

О РАЗБОИНИЦЕ[править]

5. Будет стал на разбои, то разбоиника люди на платят, то выдадят его всего со женою и з детми на разграбление.

6. Аще кто не вложится в дикую веру, тому людие не помогают, но сам платитъ.

О ПОКЛЕПНЕИ ВЕРЕ[править]

7. Аще будет на кого поклепъ, а не будет послух 7, то ж выведут веру, любо варягъ или инъ. А по костех и по мертвеце не платити веры, аже имени не ведаютъ, ни знаютъ его.

О ВСЕДЕНИИ НА ЧУЖ КОНЬ[править]

8. Аще кто сядет на чуж конь, не прошав, то за то 3 гривны.

9. Аще кто поимается за кон(ь), или за портъ, или скотину и наречет: «се мое», но поиди на свод, где еси взял, а что съ ним погибло, то платити.

О КУПЛИ[править]

11. Асще что будет татебно купил в торгу, кон(ь), или портъ, или скотину, то выведет свободна мужа два или мытника; аще начнет не знати, у кого купил, то ити по нем темъ видоком на роту, а исцу свое лицем взяти.

10. Аще коневыи тать, выдати его князю на потокъ, а клетныи тать, то 3 гривны платити ему.


О СВОДЕ[править]

12. А свода ись своего города в чужу землю нет.

О УБИТИИ ТАТЯ[править]

13. Аще yбиет кого у клети или у которои татбы, то убити во пса место, аже его до света удержит, то вести его на княжь двор, а буди люди видели связана, а убиют, то платити 12 гривенъ.

14. Аже ли крадет кто скот в хлеве или клеть, аже еди(нъ) кралъ, то платити ему 3 гривны и 30 кун, а буди их много, то всем платити по 3 гривны и по 30 кун.

О УРОЦЕХ СКОТУ[править]

15. Аще крадет скот, за лошади 60 кун, за вол гривна, за корову 40 кунъ, за лонщину полгривны, за теля, за свинию 5 кун.

16. Аже будут холопи тати, то суд княжь, их же князь обиду платитъ исцу.

О ПОКЛАЖЕИ[править]

17. Аще кто поклажее кладет у кого, тому послуха нет, но оже почнет болшим клепати, тому ити роте, у кого лежал товар.

О РЕЗЕ[править]

18. Аще кто дает куны в резы или жито в присопъ, то послуси ему ставити; как ся рядил, так ему и имати.

О ПОТОПЛЕНИИ КУПЦА[править]

19. Аще которыи купец где любо с чужими кунами истопится или рать возмет, или огнь, то не насилити ему, ни продати его; аже ли пропиется, то воля тому, чьи куны, ждут или продадут, своя им воля.

О ДОЛЗЕ[править]

20. Аще кто многим долженъ будет, а приидет гость изъ ыного града или чужеземець, не ведая запустит за него товар, и не хочет гостю дати кун, а первии должники начнут ему запинати, тогда вести его на торгъ и продати и дати преже иноземцу, а домашним, что ся останет и не поделят; аще за ним будут княжи куны, то княжи куны преже имати, а прочее в делъ; и кто много реза имал, тому не имати кун.

О БОРОДЕ[править]

21. А кто порвет бороду, а возмет знамение, и станут видоки, то 12 гривенъ продажи; аже без людеи, в поклепе, нету продажи.

О ЗУБЕ[править]

22. А зуб выб(ь)ют, кровь у него видят во рте, а людие вылезут, то12 гривенъ продажи, а за зубъ гривна.

О БОБРЕ И РАЗЛАМАНИИ БОРТИ[править]

23. А кто украдет бобръ или сеть, или разломаетъ борть, или кто посечет древо на меже, то по верви искати татя в себе, а платити 12 гривенъ продажи.

О ПОСЕЧЕНИИ БОРТИ[править]

24. Аще борть посечет кто, 3 гривны продажи, а за дерево полгривны.

25. Аже пчелы выдерет, 3 гривны же.

О ПЕРЕВЕСЕ[править]

26. Аще кто потнет вервь перевесную, 3 гривны продажи, а господину за вервь гривна.

27. А украдет кто из ловли ястреб или сокол, продажи 3 гривны, а господину гривна; за голуб 9 кун, за утя, за гус, за жаравль и за лебед 30 кунъ, а за возъ дровъ 2 ногаты.

О ГУМНЕ[править]

28. Аще кто зазжет гумно, то на поток и на грабеж дом его, а первее пагуба исплативше; а кто двор зазжет, тако же, а в проце князю поточити и.

29. Аще кто, пакости дея, любо конь зарежет, или скотину, продажи 12 гривен, а за пагубу господину урокъ платити.

О ПОСЛУСЕХЪ[править]

30. Тяжи все судити послухи свободными; будет послух холоп, то холопу на правду не стати, но оже хочет истець.

О ЖЕНЕ[править]

31. Аще кто убиет жену, темъ же судом судити, яко же и мужа; аже будет виноватъ, то пол веры, 20 гривен.

32. А в холопе и въ робе веры нетъ, но оже без вины убиет, то за холоп урокъ платити, или за рабу, а князю 12 гривен продажи.

О ЗАДНИЦЕ БОЯРСТЕИ[править]

33. Аще в боярехъ или во дружене, за князя задница не идет; оже не будет ни сынов, а дщери возмут.

34. Аще ли кто умирая, а разделит дом свои детем, на том же стояти; безрядну ли паки умрет, то всем детемъ, а на самого часть дати души.

35. Аже ли жена сядет по мужи, то дати на ню часть, а что на ню муж возложит, тому есть госпожа, а задница еи мужня не надобе; будут ли дети, то что первые жены, то возмут дети матери своеи, любо си на жену будет возложилъ, обаче матере своея и то возмут.

36. Аже ли будет сестра въ дому, то задницы еи не имати, но отдадут ю братья за муж, како си могут.

37. Аже будут робии дети у мужа, то задница им не имати, но свобода им с матерею.

38. Аже ли будут дети малы в дому, а не дюжи сами собою печаловати, а мати их поидет за муж, то кто им ближнии будет, тому дадут на руце з домом донележе возмогут, а товаръ дати пред людми; а что изрезит товаром темъ или пригостит, то ему, а истовыи товар имъ; аже ли от челеди плодъ или от скота, то все поимати лицем, а что ростерял, то ему платити.

39. Аще ж(е) отчим приимет дети со задницею, то тако же есть ряд. А двор всяко меншему сынови.

О ХОЛОПЬСТВЕ[править]

40. Холопьство обилное трое: аж(е) кто купит, хотя до полугривны, а послухи поставит, а ногату дастъ пред самим холопом.

41. А другое холопство: аж поимет рабу без ряду; поимет ли с рядом, на том и стоит.

42. А третие холопство: тиунство без ряду или привяжет ключь к себе без ряду, а с рядою, на чем ся рядил, на томъ и стоит.

43. А в даче, ни по хлебе не холоп; отидет не виноват есть.

44. Аж(е) холоп бежит, заповедает его господинъ, аж(е) слышавъ кто, или зная, или ведая дастъ ему хлеба, или путь укажет, то платити ему за холопа 5 гривен, а за рабу 6.

45. Аже переиметь чуж холоп и подастъ весть господину его, то переима ему гривна; а не ублюдет холопа, то платити ему 4 гривны, а за рабу 5 гривен.

46. А кто самъ сведает своего холопа въ чьем городе, а посадник любо не ведал, то поведати ему и пояти от него отрокъ и шедше увязати егои дати ему вяжчего 10 кун, а переима нету; аже ли за ним гоня застрелит, то себе ему беда, а не платити в том ничего.

47. Аще ли кто не ведая, чуж холоп сретит и повести деет, или держит у себя, а отидет от него, то ити ему роте, яко не ведал есмь, что холоп и бегает, а платеж(а) ему в том нету.

48. А где холоп куны вложит, а он буди не ведая дал, то господину выкупати, а ведая дал, кун лишится.

49. А кто пустит холоп в торгъ, а одолжает, то выкупати господину его или лишитися его.

50. А кто купит, не ведая, чуж(ь) холоп, то первому господину холоп, а оному куны имати, ходивше роте, яко не ведая купил есмь.

51. А чии холоп побежит, а возмет что у соседъ, то платити господину чии холоп; аще ли с ним свободнии крали или хоронили, то те князю в продажу.


PD-icon.svg Это произведение не охраняется авторским правом.
В соответствии со статьёй 1259 Гражданского кодекса Российской Федерации не являются объектами авторских прав официальные документы государственных органов и органов местного самоуправления муниципальных образований, в том числе законы, другие нормативные акты, судебные решения, иные материалы законодательного, административного и судебного характера, официальные документы международных организаций, а также их официальные переводы, произведения народного творчества (фольклор), сообщения о событиях и фактах, имеющие исключительно информационный характер (сообщения о новостях дня, программы телепередач, расписания движения транспортных средств и тому подобное).
Россия