Статут Великого княжества Литовского 1566 года/Раздел 11

Статут Великого княжества Литовского 1566 года — Роздѣл одинадцатый, о кгвалтехъ и о головщызнахъ шляхецскихъ

Дата создания: 1566. Источник: Временник Московского о-ва истории и древностей российских. — 1855. Кн.25. С. 149 − 166; Статут Вялікага княства Літоўскага 1566 года. — Мінск, 2003. — С.35-263. За виданням 1855 року; [1].

РОЗДѢЛ ОДИНАДЦАТЫЙ, О КГВАЛТЕХЪ И О ГОЛОВЩЫЗНАХЪ ШЛЯХЕЦСКИХЪ.

АРТЫКУЛЪ 1.

Хто бы на чіи домъ або на господу умысльнѣ наѣхалъ, хотечи его забити.

Хто бы на чій домъ а господу умыслнѣ наѣхалъ, хотечи его забити, а умыслнѣ наѣхавши або нашедши, въ томъ дому кого кольвекъ ранилъ або забилъ, а то бы на него переведено было слушнымъ доводомъ; таковый горло тратитъ, а головщизна близкимъ зъ имѣнья плачона быти маеть. А естьли бы кгвалтомъ наѣхалъ або на домъ нашолъ, а никого не ранилъ а ни забилъ, а знаки предсе кгвалту або шкоду якую учинилъ; тогды только за кгвалтъ будеть повиненъ платити дванадцать рублей грошей и шкоду оправити за слушнымъ доводомъ, а горла для нахоженья кгвалту не тратить. Тымъ же тежъ обычаемъ естьли хто кому въ мѣстѣ на господу нашолъ кгвалтовнѣ, а кого забилъ або ранилъ и тымъ покой посполитый взрушилъ, маеть быти сужонъ и сказанъ на горло.

АРТЫКУЛЪ 2.

О доводъ кгвалту, якъ маютъ освѣдчати и обжаловати.

Уставуемъ, кгды бы хто на кого наѣхалъ кгвалтомъ и забилъ, а вѣдь же на такового кгвалтовника такій доводъ маеть быти: естьли бы на чый домъ або на господу чью наѣхал и забилъ кого; тогды скоро по ономъ кгвалтѣ того жъ часу кгвалтъ и того забитого маеть оповѣдати и оказати околичнымъ суседомъ своимъ, а въ небытности ихъ ино врядникамъ ихъ шляхтѣ людем добрымъ, а въ недостатку шляхты ино также околичным сусѣдомъ своимъ, хотя и не шляхтѣ только людемъ добрымъ вѣры годнымъ маеть оказати, а потомъ обжаловати вряду замковому або двору нашому, которій близшій будеть, и возного взяти и такъ же оказати кгвалтъ и забитого, и тотъ кгвалтъ и жалобу въ книги записати. И въ правѣ естлибы се ку оному кгвалту и забитому не зналъ; тогды вжо тотъ жалобникъ близшій будеть того сусѣди околичными и вознымъ або выписомъ врядовьшъ на него доводити, и при томъ доводѣ самотреть и зъ шляхтичами собѣ ровными присегнути, а естлти бы на тотъ часъ не могли мѣти шляхтичовъ ку доводу, тогды и зъ жоною своею и съ дѣтьми дорослыми, а не будеть ли мѣти дѣтей дорослыхъ, ино и зъ жоною и зъ слугами домовыми маеть того кгвалтовника поприсегнути, а кгды присягнеть, тогды тогь горло тратить, а головщина его близкимъ того забитого маеть быти плачона, а шкоду за слушнымъ доводомъ. А естли бы кгвалтомъ на домъ наѣхалъ и не забилъ, только ранилъ; тогды также маеть тотъ кгвалтъ оповѣдати и раны оказати околичными сусѣдьми, яко вышей описано, и при таковомъ доводѣ оного вгвалтовника кгвалту и ранного маеть самъ семъ зъ людьми добрыми шляхтою поприсегнути, а кгды присягнеть, таковый кгвалтовникъ маеть быти горломъ каранъ, нижли естьли бы сполна шести свѣдковъ не мел, тогды и съ трема свѣдки самочвартъ присегнути маеть, а кгвалтовникъ за таковымъ незуполнымъ доводомъ горла не тратитъ, одно кгвалту дванадцать рублей грошей, а навезку водле стану и шкоду за доводомъ маеть платити, а за вину дванадцать недѣль въ везенью седѣти. Пакли бы на томъ доводѣ своемъ усталъ, тогды только самъ ранный на ранахъ своихъ присегнути маеть, которому по присязѣ его навезка будеть сказана, а кгвалтъ и шкоды не мають быти сказаны. А гдѣ бы на оном кгвалтѣ въ дому никого не забито ани ранено, только одно шкода учинена; таковый кгвалтъ также маеть быти освѣдчонъ, яко вышей описано, а при томъ доводѣ у правѣ на кгвалтовника маеть тымъ же обычаемъ на кгвалтѣ и на шкодахъ самотретъ присегнути, а кгды присягнеть, маеть быти кгвалтъ плачонъ дванадцать рублевъ грошей, и шкоды оправити за доводомъ его, а горла не тратитъ, а не будеть ли мѣти чимъ платити, а именье его тое бы шкоды и маетность не стояла, тогды у въ остатку заплаты самъ маеть быти выданъ. А гдѣ бы тотъ, на чій домъ наѣхалъ, чинилъ собѣ быти ровную шкоду о сорокъ або о петдесятъ копъ грошей; то и зъ жоною и зъ дѣтьми лѣтъ дорослыми на той шкодѣ присегнути маеть. А жонѣ дѣтемъ забитого, а въ недостатку ихъ, ино кровнымъ такимъ же обычаемъ маеть право ити, яко вышей описано.

АРТЫКУЛЪ 3.

О кгвалтъ костела закону хрестіянского.

Тежъ естьли бы хто пришедши кгвалтовнѣ на костелъ або на цвинтару въ школѣ, або въ капланскомъ поповскомъ дому кого забилъ або ранилъ, а тые бы раны значны были; тогды подъ таковымъ же способомъ и доводомъ маеть быти каранъ, яко вышей о кгвалтовникахъ описано. А естьли бы только вдарилъ, а раны не было; тогды совито кгвалтъ маеть платити, то естъ двадцать и чотыри рубли грошей, а оного вдаренаго навезати, и то все заплативши еще двадцать недѣль у везенью маеть седѣти въ томъ повѣтѣ, гдѣ ся то станетъ.

АРТЫКУЛЪ 4.

О кгвалтовнику, который забивши зъ земли втечеть.

Тежъ естьли бы таковый кгвалтовникъ забивши кого въ дому въ въ господѣ на улицы на дорозѣ и гдѣ жъ кольвекъ, будучи первей запозванъ хотя бы тежъ и заочнѣ, втекъ изъ земли прочъ; тогды маеть первей быти выволанъ съ того панства нашого, а потомъ головщызна и шкода маеть быти плачона зъ имѣней его. А гдѣ бы тое имѣнье за головщизну и шкоду не стояло; однакожъ тое имѣнье маеть быти въ той головщизнѣ и въ шкодахъ подано дѣтемъ того забитого або кревнымъ, и мають держати потоль, поки ажъ того выволаного дѣти або кревные тую суму за оные имѣнья отложать, нижли таковые дѣти або кревные тую суму мають откладати, которые того мужобойства не помогали. А естлибы по выволаню оного кгвалтовника або забойца налезенъ былъ въ томъ панствѣ нашомъ; тогды и на томъ врядѣ, гдѣ будеть постижонъ, маеть быти каранъ яко кгвалтовникъ, а не будеть ли хто стояти або фалдровати, тогды врядъ нашъ, маючы певную вѣдомость о томъ мужобойцы або кгвалтовнику, маеть также на томъ врядѣ своемъ поймавшы скарати, яко о томъ вышей описано. А въ томъ часѣ нижъ постижонъ и на врядѣ скаранъ будеть, трафить ли ся кому жъ кольвекъ его забити, за такового выволанца забитье нихто головщизны платити не будеть повиненъ.

АРТЫКУЛЪ 5.

Хтобы злочынцовъ, разбойниковъ, злодѣевъ явныхъ, а людей выволаныхъ, въ себтъ въ дому переховывалъ.

Тежъ уставуемъ, хтобы съ подданыхъ нашихъ господарскихъ людей подойзреныхъ злоцынцовъ разбойниковъ явныхъ выволанцовъ въ дому або имѣню своемъ переховывалъ, маючы вѣдомостъ, кимъ которую раду помочъ ку шкодѣ Речы Посполитой давалъ и чынилъ, або тежъ и речей злодейскихъ вѣдомо пожывалъ, а то бы на него было переведено слушнымъ правомъ; тогды таковый маеть быти горломъ каранъ таковый и онъ злочынца, которого онъ въ дому переховывалъ. А ведже жалобливая сторона за онымъ злочынцою або выволанцемъ, гдѣ бы о нем вѣдалъ хотя бы и въ иншомъ повѣтѣ того панства нашого, взявшы выписъ зъ ураду маеть ѣхати и на ономъ врядѣ, такъ тежъ и въ мѣстехъ по торгохъ у костелехъ ознаймити, и цедулу написавшы, о его выволаню маеть поприбивати и о немъ ознаймити. А чрезъ таковое оповѣданье оного злочынцы або выволанца, а хто бы вѣдаючы и знаючи его ховалъ, также маеть каранъ быти яко вышей описано и шкода зъ имѣнья его плачона за слушнымъ доводомъ, а довод на такового не инакшій маеть быти, одно таковый якъ на самого злочинцу, а естлибы повѣдалъ, ижъ бы его не вѣдалъ и не зналъ, тогды тое невѣдомости маеть отприсягнути.

АРТЫКУЛЪ 6.

Хто бы забилъ кгвалтовника въ дому своемъ и помочниковъ его.

Тежъ уставуемъ, хтобы на чій домъ або на господу кгвалтомъ наѣхалъ або нашолъ, а тоть господарь домовый также и гость, который въ дому его томъ або господѣ стоить, оного кгвалтовника самого або помочниковъ его боронечи дому своего забилъ; тогды скоро по ономъ кгвалте маеть сусѣдомъ своимъ околичнымъ обволати и оповѣдати, и того жъ часу до вряду нашого, который будеть наблизшій, ѣхати або слати, изъ уряду взявшы возного и сторону людей добрыхъ шляхту а иншихъ сусѣдовъ вѣры годныхъ, оный кгвалтъ и забитого кгвалтовника въ дому своемъ сказати. А потом кгды будетъ о тые забитые обвиненъ; тогды за оказаньемъ слушнымъ знаковъ кгвалту маеть зъ жоною и съ дѣтьми дорослыми и съ тремя шляхтичи собѣ ровными, а не будеть ли мѣти жоны або дѣтей, ино съ тыми трема шляхтичома собѣ ровными предсе маеть присегнути и тымъ ся отвести на томъ, ижъ тотъ забитый кгвалтом наѣхалъ або нашолъ, а сталося за початкомъ того забитого. А естли бы только ранил, а не забилъ; тогды самъ одинъ панъ домовый маеть присегнути, ижъ яко кгвалтовника вх дому своемъ ранилъ, таковый головщизны ранъ и ни шкодъ никоторых платити не будеть повиненъ.

АРТЫКУЛЪ 7.

Хтобы наѣхалъ або нашолъ на чужое имѣнье або на село кгвалтомъ, а въ томъ боронечи кгрунту своего кого забилъ.

Тежъ уставуемъ, которому бы шляхтичу шляхтичъ або хтожъ кольвекъ умыслнѣ на чіе имѣнье кгвалтомъ наѣхалъ або нашолъ, кгвалтъ або якую значную шкоду учинилъ, а тотъ шляхтичъ боронечи имѣнья своего оного кгвалтовника забилъ; тогды маеть тымъ же способомъ, яко вышей о кгвалтовникахъ написано, присегою своею отвестися, и кгды присегою ся отведетъ, ижъ его яко кгвалтовника на своей земли забилъ, такового головщизны ани шкодъ платити не будеть повиненъ.

АРТЫКУЛЪ 8.

О кгвалтъ дѣвки и невѣсты.

Тежъ уставуемъ, хтобы дѣвку або учтивую невѣсту якого кольвекъ стану сильствомъ зкгвалтилъ, а оная дѣвка або невѣста за онымъ учинкомъ волала кгвалту, за которымъ воланьемъ люде бы прибѣгли, знакъ кгвалту оказала а потомъ бы оного ку праву притегнула, а двѣма або трема свѣдки кгвалтъ пересвѣдчила, а ку тому при оныхъ свѣдкохъ на томъ кгвалтѣ своемъ на того присегнула; тогды таковый маеть быти каранъ горломъ, а навезка маеть быти зъ имѣнья его водле стану, якого будеть, плачона. Пакли бы оная дѣвка або невѣста кгвалту волала, а люди оные слышели, нижли на кгвалтъ не прибѣгли, а ведже по ономъ кгвалтѣ скоро бы пущона была, а оповедалася тымъ людемъ, и зась оного ку праву притегиула, а тыми людми освѣдчила; тымъ же обычаемъ каранъ маеть быти, яко вышей описано, а естли бы похотѣла его собѣ за мужа мѣти, то будеть на ее воли.

АРТЫКУЛЪ 9.

О кгвалтовное взятье въ малженство дѣвки вдовы и каждое невесты.

Уставуемъ, хто бы безъ воли отца и матки стрыевъ або близкихъ на якомъ кольвекъ мѣстцу взялъ кого съ тыхъ вышеймененыхъ кгвалтомъ, менуючы ижъ бы ему въ малженство его шлюбила, а то бы пришло до насъ Господара або передъ пановъ радъ нашихъ и передъ кождый врядъ; таковая персуна маеть первей быти взята до секвестру. И кгды то покажетъ съ права, же яко пріятель кревныхъ такъ тежъ и ее самое на то позволенья не было; тогды тотъ хто се того важылъ, маеть горломъ каранъ быти, а за навезку третяя часть всего имѣнья его маеть спасти на тую парсуну кгвалтомъ взятую, а шкоды, которые се будуть при томъ кгвалтѣ стали, за доводомть на двохъ частехъ того жъ имѣнья его маеть быти сказано. Нижли естли бы дѣвка, укривши то передъ родичами своими, на тое малженство и на взятье позволила и на правѣ се того знала; тогды таковая дѣвка отпадываеть оть выправы и отъ всихъ имѣней своихъ отчизныхъ и материстыхъ, яко о томъ вышей написано въ роздѣлѣ пятомъ.

АРТЫКУЛЪ 10.

О мужу и жонѣ о замордованье до смерти.

Тежъ кгды бы зъ ненависти и зъ немилости на обѣдвѣ сторонѣ, такъ мужъ яко и жона, будучи въ ростырку зъ якихъ кольвекъ причинъ, одинъ другого приправилъ о горло, замордовалъ, або струлъ; такое окрутенство и замордованье сынове або кревные то маютъ до вряду оповѣдати и обжаловати або фалдровати на кождого такового мордера. А хотя бы сынове або кровные не хотели фалдровати; тогды врядъ нашъ зъ мѣстца своего маеть того особливе перестерагать и съ пильностію около того вывѣдати, и у въ околичныхъ сусѣдовъ близкихъ о того замордованого опытъ чинити, и обобравши семи шляхтичовъ ку присезѣ припустити, которые о томъ подъ присегою справедливе мають того передъ врядомъ повѣдити. И кгды тая семъ шляхтичовъ о того замордованого, на кого присягнутъ; таковый мордеръ безъ маеть быти каранъ горломъ тымъ способомъ, яко бы отца имилости матку забилъ.

АРТЫКУЛЪ 11.

О похвалку за которою бы ся стала якая шкода и отповѣдь на горло.

Тежъ если бы хто на кого похвалился, въ похвалцѣ сталася шкода, спалено домъ, дворъ, гумно, або збожъе зложоное, або тежъ што кольвекъ огнемъ ускажоно; нижли бы ся тая шкода стала, маеть первей жалобливая сторона тую похвалку его того жъ часу на врядѣ нашомъ оповѣдати и записати, а потомъ безъ мѣшканья его припозвати маеть. А естли бы ся передъ врядомъ призналъ, ижъ тую похвалку учинилъ, або и не зналъ, а было бы то на него слушне переведено; тогды маеть быти данъ за поруку. А естли бы потомъ оной сторонѣ жалобливой шкода стала, а тотъ бы, на него хто ся похвалилъ, позвавши ку праву самъ и съ жоною и съ дѣтьми дорослыми на шкодѣ своей, ижъ отъ него маеть, поприсегнулъ съ с такимъ доводомъ, яко вышей о кгвалтехъ домовыхъ описано; таковый будеть повиненъ сторонѣ жалобливой оную шкоду оправити и платити, а собѣ винного искати, хто тую шкоду учинилъ. Тымъ же обычаемъ и не шляхтичи противъ шляхты у права заховани быти мають. А хто бы тежъ на кого учинилъ похвалку, отповѣдаючи на горло, ино сторона жалобливая тымъ же способомъ мають тую похвалку передъ врядомъ оповѣдати и дати записати, и притягнувши ку праву тую похвалку людьми добрыми вѣры годными шляхтою трема свѣдками то на него перевелъ; тогды такъ оселый яко и не оселый для лепшое безпечности покою посполитого маеть быти данъ за доброе рукоемство людемъ осѣлымъ. Кгды бы за таковою похвалкою забито, того на кого ся похвалилъ, такового поручники передъ врядомъ мають поставити, а сторона жалобливая самотреть зъ шляхтою естли присягнетъ, ижъ отъ него то забойство сталося; тотъ горломъ маеть быти каранъ, а головщизна близкимъ зъ имѣнья его маеть быти плачона. А гдѣ бы рукоемства о тую похвалку дати не хотѣлъ; ино врядъ такового маеть дати до везенья замкового, и до того часу маеть седѣти, ажъ рукоемство дастъ. А пакли бы поручникъ того, по комъ ручилъ, передъ врадомъ не постановилъ; тогды маеть головщизну самъ кровнымъ платити, а у везенью такъ долго седѣти, ажъ тотъ, по комъ ручилъ, пріѣхавши исъ такового обвиненья выправится, або, естли будеть виненъ, заплату свою озметъ.

АРТЫКУЛЪ 12.

Естли бы колко парсунъ шляхецскихъ о забитье одного шляхтича обвинено было.

Уставуемъ, естьли колко парсунъ объ одного шляхтича забитье было обвинено, а сторона жалобливая не вызволяючи ни отъ кого зъ нихъ, але ихъ колко присегнуло; тогды одинъ зъ нихъ, которого на смертъ оберуть и поприсягнетъ, маеть горломъ каранъ быти, а тые помочники его, на которихъ тежъ ровно сторона поприсегнула, ачъ кольвекъ бы ведле правъ Хрестіянскихъ винни бы тые вси горло дати, нижли мы занехавшы такъ срокгого права на таковыхъ уставуемъ, ижъ тые вси помочники его, иле ихъ будеть, мають сто копъ грошей платити и въ везенью сорокъ и шесть недѣль^[1] седѣти на замку Виленьскомъ або Троцкомъ въ земли шесть сажонъ, а трафитъ ли ся тое забійство въ которомъ воеводствѣ або у староствѣ далеко, тогды на томъ замку того выоеводства тотъ мужобойца маеть седѣти также у земли шесть сажонъ. А панове воеводе старостове на замкохъ нашихъ мають тые турмы доброе оправены и вкопаны мѣти глубоко шесть сажонъ у земли, за певною сторожою, и не мають таковымъ вязнемъ фолкги никоторое допущати чинити, и съ того везенья до сороку а шести недѣль выпущати подъ ласкою нашою господарскою. И будеть ли двохъ або трехъ забитого и колко ихъ особъ шляхецскихъ, тогды за кождого шляхтича особа шляхецская горломъ карана быти маеть. А естли бы простый хлопъ шляхтича, тогды, колько ихъ будеть поймано и передъ врядомъ обвинено и поприсягнено, мають вси горломъ карани быти, а вежде хлоповъ простыхъ вышей семи человѣковъ объ одну голову шляхецскую карано быти не маеть. Также и о шляхтянкахъ розумѣно быти маеть.

1. Трет. ред. Стат. «рокъ и шесть недель».

АРТЫКУЛЪ 13.

О звадахъ шляхецскихъ.

Хто бы кому руку або ногу втялъ, або око, губу, зубы, ухо вытялъ, за кождый таковый члонокъ по петдесятъ копъ грошей платити, а двадцать и чотыри недѣли на замку седѣти. Або хто бы обѣ двѣ руки и обе двѣ ноги и обѣ двѣ ухи оттялъ и обѣ двѣ очи; тогды головщизну яко за человѣка маеть плачоно сто копъ грошей, а годъ и шесть недѣль седѣти. А рана, которая бы у человѣка была, съ которое бы кости выбирано, тридцать копъ грошей. А естли бы съ тое раны речъ замкнулъ, хотя бы се и выгоилъ; тогды маеть сто копъ грошей яко головщизны платить, рокъ и шесть недѣль седѣти. А естли бы рана была на твари, сорокъ копъ грошей платити; а хотя бы поличокъ кому далъ, бороду рвалъ, тогды за все тое по дванадцати рублевъ грошей платити; а хотя бы былъ киіемъ шляхтича, сорокъ копъ грошей платити. А бѣлымъ головамъ шляхецскимъ якъ головщизна такъ и навезка маеть быти плачона совито, тымъ же обычаемъ потомъ и ихъ жонамъ и дѣтемъ, которіе вѣнчалные жоны мають, маеть быти навезка шляхецская.

АРТЫКУЛЪ 14.

О вказанье шляхецства за всказаньемъ навезки.

А естли бы по всказанью навезки шляхецское сторона противная повѣдила, ижъ водлугъ сказанья судового навезку ему платити готовъ, нижли не есть есми свѣдомъ, естли онъ естъ шляхтичъ, або и радъ бымъ о томъ вѣдалъ; тогды тотъ, хто ся шлихтичомъ менитъ быти, маеть ѣхати до оное земли або повѣту, отколь родомъ естъ, и тамъ же маеть, зобравши братью и стрыевъ або кревныхъ своихъ, передъ врядомъ тамошнимъ маеть высвѣдчитися, ижъ естъ шляхтичъ, а врядъ зъ оное земли або съ повѣту маеть писати листъ зъ уряду до суду, гдѣ ся тое право точило, даючи о немъ свѣдецство, ижъ есть щляхтичъ. И кгды таковую о собѣ вѣдомость принесетъ, врядъ маеть оную сторону противную листомъ своимъ обослати, складаючи ему рокъ короткій, на которомъ яко на завитомъ ставши маеть прислухати, и навезку шляхецскую ему заплативши, будеть еще повиненъ страву шкоду, што на то ѣздечи наложилъ, за присегою его платити ведле важности и далекости дороги. А ведь же естли бы не оселый человѣкъ доведовался оного шляхецства; маеть до того часу, поки онъ зъѣздитъ, за поруку данъ быти.

АРТЫКУЛЪ 15.

О мѣщанине, который бы шляхтича ранилъ.

Если бы который мѣщанинъ у бурмистровствѣ шляхтича забилъ ^[1] або ранилъ; тогды маеть навезати такъ, яко вышей описано. Нижли естли бы бурмистромъ на тотъ часъ не былъ, кгды шляхтича, ранилъ; маеть руку тратить. Также тежъ и хлопъ простый, естли бы забилъ або ранилъ шляхтича, маеть руку тратить, а естли руку або ногу шляхтичу утнетъ, або на которомъ члонку охромитъ, маеть горломъ каранъ быти.

1. Вместо «забилъ» должно быть «збилъ».

АРТЫКУЛЪ 16.

О забойцах отца и матки.

Уставуемъ, естьли бы хто отца або матку свою изъ якое замети забилъ, якимъ кольвекъ обычаемъ родича своего о горло приправилъ; тогды таковый сынъ або дѣвка, которая причиною своею родича своего о горло приправила, не только горломъ маеть быти каранъ, але и почтивость и вси имѣнья тратитъ, и таковою смертью и потварностью ганебною маеть каранъ быти: по рынку возечи и клещами тѣло его торгати, а потомъ у мѣхъ скураный усадивши, до него пса кура ужа котку, и тое все посполу въ мѣхъ завезавши, гдѣ наглубей до воды утопити, тымъ же тежъ обычаемъ и помочниковъ его, которихъ поволаетъ або на нихъ правомъ будеть переведено, маеть быти караны. А естли бы ся трафило отцу сына своего дорослого або матцѣ дѣвку дочку свою властную забити; тогды таковый оцецъ и матка мають караны быти за тое: годъ и шесть недѣль на замку нашомъ у вежи седѣти, а выседѣвши годъ и шесть недѣль, мають еще до году чотыри кроть при церкви и при костелѣ головномъ покутовати и вызнавати явнѣ найвышній грѣх свой передъ всими людьми збору Хрестіянского.

АРТЫКУЛЪ 17.

Если бы хто брата або сестру забилъ.

Уставуемъ, естли бы хто брата або сестру забилъ, въ неданью имѣнья або якую кольвекъ на правою о горло приправилъ, а то бы на него доводомъ слушнымъ переведено; тогды таковый маеть быть каранъ горломъ, а тое имѣнье, которое бы на него и на дѣти его припасти мѣло, спадываеть на иншую братью або сестры або тежъ на стрыевъ и близкихъ въ томъ дому. Тымъ же обычаемъ естли бы зять забилъ шурина своего; тогды жона его сестра того забитого и дѣти ее до имѣнья по братѣ своемъ не маеть ничого мѣти, а тотъ хто забилъ, маеть горломъ каранъ быти. Тоежъ право и на тыхъ, хто бы кровного своего забилъ и далекого въ роду.

АРТЫКУЛЪ 18.

Который бы слуга забилъ або ранилъ пана своего.

Тежъ уставуемъ, естли бы который слуга взялъ передъ себе злый умыслъ, пана своего забилъ або ранилъ; таковый маеть срокго горломъ каранъ быти здрайца, а естли бы не забилъ ани ранилъ, одно брони противъ пана своего добылъ, таковый руку тратить.

АРТЫКУЛЪ 19.

Хто бы на кого на дорозѣ заселъ, а въ томъ самъ забитъ былъ.

Уставуемъ, гдѣ бы шляхтичъ другому шляхтичу добровольнѣ дорогу засѣлъ, хотечи того забить або ранить, а тотъ боронечи горла своего не маючи зъ нимъ никоторого зайстья, а того, хто засѣлъ, забилъ; тогды тотъ скоро по ономъ забитью маеть ѣхати оповедати вряду и высвѣдчитися людьми добрыми вѣры годными, ижъ тотъ забитый засѣлъ и початкомъ того забитья самт, былъ, а кгды на томъ и съ тымъ доводомъ присягу вчинитъ, воленъ будеть отъ головщизны и отъ седѣнья.

АРТУКЫЛЪ 20.

Если бы шкода або кгвалтъ кому стался, такъ въ чіемъ дому яко и на дорозѣ, за вѣдомостью домового господаря.

Уставуемъ, кгды бы се кому въ чіемъ кольвекъ дому або на дорозѣ за вѣдомостью домового господаря якая шкода або кгвалтъ се сталъ, а оный господарь былъ бы до суду позванъ, а было бы то на него слушнымъ доводомъ або якими знаки врядовне переведено; таковый повиненъ будеть оный кгвалт и шкоду своими властными пенезьми платити и оправити, а тыхъ кгвалтовниковъ шкодниковъ собѣ искати, нижли естли бы того господаря лице налезено або помочниковъ его.

АРТЫКУЛЪ 21.

Хтобы на чіе имѣнье на село и на люди наслалъ, або самъ наехавши кгвалтомъ побилъ, поранилъ.

Уставуемъ, хто бы на чіе имѣнье на село на люди самъ кгвалтомъ наѣхалъ, або наславъ побилъ и поранилъ; таковый сторонѣ ображоной, на чомъ слушный доводъ учинить иаеть кгвалтъ и раны платити, а грабежъ зъ навезкою ворочати маеть, и всю школу добре оправити. А хотя бы не ранилъ ани билъ, только наѣхалъ а грабилъ; потомужъ кгвалтъ маеть заплатити, и грабежъ зъ навезкою поворочати.

АРТЫКУЛЪ 22.

За кгвалтъ посполитый сусѣдскій.

Уставуемъ за кождый кгвалтъ посполитый сусѣдскій, врядовне переведеный, маеть быти сказанъ сторонѣ обжалованой дванадцать рублей грошей.

АРТЫКУЛЪ 23.

Если бы шляхтичъ шляхтича розбилъ на дорозѣ.

Уставуемъ, если бы шляхтичъ шляхтича розбилъ на дорозѣ, а оный розбитый у парсуну его позналъ, и передъ врядомъ того жъ часу раны свои оказавши того у парсуну меновалъ; а потомъ притягнувши ку праву, подле оказанья ранъ своихъ близшій будеть самъ изъ шестма шляхтичами на него присегнути, а кгды присягнетъ, тотъ горломъ каранъ быти маеть яко розбойникъ. А естли бы сторона поводовая и зъ шестма свѣдки поприсегнути не хотѣла; тогды тотъ обжалованый также самъ и зъ шестма шляхтичы маечъ отприсегнутися, а не будеть ли мѣти съ кимъ отприсегнутися, ино поводовая сторона самотретъ на ранахъ и шкодахъ маеть его поприсегнути. А будеть ли на дорозѣ звада стала, а лупу никоторого не было, а сторона жалобливая вину дала разбойную; тогды только раны за доводомъ будеть повиненъ платити, а горла для розбою менованого не тратитъ.

АРТЫКУЛЪ 24.

Который братьи рожоной будеть отца забито або зъ нихъ самыхъ которого кольвекъ.

Уставуемъ ижъ кгды бы колько братьи рожоной, лѣта зузопольные маючы або и недорослые, дѣльные або и недѣльные, а одного бы зъ нихъ або отца ихъ забито, а иншые бы братья были бы по службах або въ чужой земли; ино который братъ будеть дома, тотъ братью маеть обослати, абы зъ нимъ тое головщизны искали. Естли бы братья его будучи въ здѣшнемъ панствѣ нашомъ зъ нимъ весполокъ головщизны искати не хотѣли; тогды тотъ, который дома мѣшкаетъ, маеть самъ тое головщизны доходити, а дошедши съ тою жъ братьею своею не будеть дѣлити. Одно кромъ хто бы былъ въ чужой земли, а пріѣхавши оттоль и той головщизны припытовался; таковый, кгды накладъ его што доходечи тое головщизны будеть наложилъ, ему часть свою, которая бы межи братьею на него припасти мѣла, отложити, тогды маеть межи братьею своею ку части ровной тое головщизны припущонъ быти.

АРТЫКУЛЪ 25.

Хто близкій головщизны искати маеть.

Коли бы колько братьи было и сестръ рожоныхъ выпосажоныхъ и не выпосажоныхъ, а одинъ брать отъ ихъ забитъ былъ; тогды они сами братья мимо сестръ выпосажоныхъ маюць головщизны доходити, и естьли бы братья змерли, тогды и дочки выпосажоные мають головщизны искати, а естли бы сынове и дочки змерли, тогды близкіе доходити мають.

АРТЫКУЛЪ 26.

О звадахъ.

Если бы хто съ кимъ звадилъ, а въ оной звадѣ оба два се ранили, а одинъ бы съ тыхъ позванъ до права, а свѣдковъ бы межи собою не мѣли, хто бы мѣлъ межи ими розознати, а оба два се торгали ку присязѣ, а одинъ бы другому не допустилъ; тогды судъ мають жеребей искати и кинути, чій се жеребей наипервей выйметъ, тотъ маеть присегнути на ранахъ своихъ и на початку, ижъ онъ первей почалъ его бити и за онымъ початкомъ тая ся звада стала. А коли оный присягнетъ, тогды оныи тому присяглому маеть за раны платити, якого жъ стану будеть. А гдѣ бы ся въ оной звадѣ оба два се зъбили, а не было бы свѣдковъ на обѣ сторонѣ; ино потомкое або близкіе забитыхъ вжо головщизнъ собѣ искати не мають. А естли у въ одное стороны раны будуть, а зъ другое стороны забитый; тогды при ономъ забитомъ, близшій будеть доводъ чинити нижли при ранномъ, и кгды будеть правомъ поконанъ, маеть головщизну платити сто копъ грошей, и естли за шляхтича будеть платити головщизну, тогды тотъ маеть рокъ и шесть недѣль сѣдети, а за хлопа простого везенья не повиненъ терпѣти, только головщизну платити.

АРТЫКУЛЪ 27.

О звадѣ вечерней.

Тежъ коли бы при якой вечерней звадѣ хто кольвекъ свѣчу загасилъ, въ томъ кого съ тыхъ, которіе при той звадѣ были, ранено было не вѣдаючы отъ кого, и позвано бы до суду того, хто свѣчу загасилъ, менуючы такжо мене въ той звадѣ ранено, а не вѣдаю отъ кого за причиною твоею, и на то бы доводъ учинилъ, а естли бы и доводу не чинилъ, смѣлъ бы присегнути; тогды тотъ, хто свѣчу загасилъ, повиненъ ему раны платити такъ тежъ и головщизну. Въ такой пригодѣ хочемъ мѣти, абы сужоны яко вышей описано, а тотъ, заплативши вси раны або головщизну и заседѣвши головщизну и заседѣвши годъ и шесть недѣль, маеть собѣ винного искати. Тымъ же обычаемъ хто бы кого съ пригоды забилъ, а повѣдилъ, жемъ то не умыслнѣ учинилъ; тогды тотъ маеть вывестися людьми добрыми вѣры годными, которые при томъ были и то видѣли, ижъ съ пригоды се тое стало а не зъ умыслу; кгды то они сознають, предся будеть повиненъ на томъ присегнути, ижъ съ пригоды а не зъ умыслу а ни зъ вазни тое забійство учинилъ, а по присязѣ предсе головщизны повиненъ платити, естьли шляхтича забилъ рокъ и шесть недѣль седѣти.

АРТЫКУЛЪ 28.

Хто бы кого неумыслнѣ ранилъ, а до суду былъ позванъ.

Коли бы тежъ хто кого ранилъ, и его о рану позвалъ, а оный позваный бралъ бы се на одводъ; мы бачечи, ижъ нихто въ невинности своей терпѣти ранъ не маеть, сказуемъ ижъ тые раны жалобнику мають быти справованы по тому, яко вышей описано о звадахъ.

АРТЫКУЛЪ 29.

Слуга, который боронечи пана своего, коли бы кого забилъ або ранилъ.

Тежъ уставуемъ, ижъ коли бы у якой звадѣ слуга боронечы пана своего, кого забилъ або ранилъ; таковый отъ кождого права маеть быти воленъ, але сторона жалобливая будеть тыхъ ранъ и головщизну на пану его дохотити. Нижли естли бы чій слуга своволнѣ безъ расказанья пана своего передъ очима кого забилъ або ранилъ, хотя бы не былъ припоручонъ; маеть панъ его поймати и до везенья посадити, а кровнымъ забитого дати вѣдомость. И естли бы фолькгуючи служебникови своему поимати его не хотѣлъ, а онъ потомъ забивши втекъ; тогды тотъ панъ повиненъ будетъ сам головщизну платити, естли шляхтича забилъ, то рокъ и шесть недѣль седѣти маеть, а ранному, якого стану будеть, раны оправити, и по заплатѣ головщизны, первей нижли на седѣнье року и шести недѣль пойдетъ, маеть на томъ присегнути, ижъ безъ росказанья его и порады тая головщизна стала, а естли бы отприсегнутися не хотѣлъ, а пустилъ сторону жалобливую на себе присегнути, тогды маеть горломъ каранъ быти.

АРТЫКУЛЪ 30.

Естьли бы чій слуга, учинивши кому кгвалтъ домовый або головщизну, прочъ втекъ.

Гдѣ бы чій слуга учинилъ кому кгвалтъ домовый або головщизну втекъ, а въ его пана черезъ сторону былъ застатъ, а приповѣданъ, а онъ черезъ туюжъ заповѣдь его упустилъ; тогды тотъ панъ, чій то слуга вчинилъ, самъ кгвалтъ головщизну и шкоду платити маеть, а собѣ на слузѣ искати, и заплативши маеть на томъ присегнути, ижъ тотъ слуга кромъ вѣдомости и позволенья его то учинилъ, а не естъ то через его умышленье при рукъ ^[1] выпущонъ, а гдѣ бы присегнути не хотѣлъ, тогды тотъ певне самъ панъ маеть быти каранъ горломъ, яко кгвалтовникъ и мужобойца. А естли бы тотъ слуга небылъ приповѣданъ; тогды панъ не повиненъ за его платити, одно се маеть отприсегнути, ижъ тотъ кгвалтъ безъ его позволенья и вѣдомости стался.

1. Трет. ред. Стат.: «съ прирукы».

АРТЫКУЛЪ 31.

О забитье человѣка перѣеждчого и безплеменнаго.

Уставуемъ, тежъ, естьли бы ся потрафило гдѣ жъ кольвекъ забитого человѣка перехождчаго або безплеменнаго, которого головщизны искати не будетъ кому; тогды скоро такового человѣка трупъ будеть знайденъ, того жъ часу врядъ того замку або двора нашого врядникъ маеть обослати всихъ мѣщанъ людей сельскихъ, такъ и подданыхъ нашихъ яко и шляхецскихъ, и опыт вчинити разъ або и два, а гдѣ бы се на такихъ двохъ копахъ о томъ забитью вывѣдатися не могли, тогды третюю копу присяжную маеть врядъ собрати, на которой повинни будуть вси тые, которые на той копѣ повинни се становити, присегнути на томъ, ижъ сами не суть причиною того забитья и о таковомъ мужобойцы не вѣдаютъ. А естли бы которыя съ тыхъ копниковъ на присяжной копѣ нестали, або хотя и ставши, присегою отвестися не хотѣли; тогды таковые будуть повинни головщизну сами платити, а собѣ винного искати, а тая головщизна маеть зостати при томъ врядѣ, въ которомъ тотъ трупъ налезенъ, а потомъ, кгды бы кровные оного забитого выналезлися, маеть тая головщизна онымъ кровнымъ отдана быти.

АРТЫКУЛЪ 32.

О промолчанье кгвалту або злодейства.

Уставуемъ, кгды бы хто кому кгвалтъ учинилъ або злодѣйство шкоду або якій грабежъ, а тотъ бы молчалъ отъ того часу, яко се то стало три годы, вжо о то будеть вѣчнѣ молчати.

АРТЫКУЛЪ 33.

Который злочинца будетъ на смерть сказанъ, а отъ того бы се откупилъ або отпрошонъ былъ.

Тежъ уставуемъ, естли бы хто о злодѣйство або о которое иное злочинство на каранье або на смерть врядомъ права посполитого всказанъ былъ, а въ томъ караньи горло свое пенязьми откупилъ, або от того каранья або отъ страченья горла черезъ пріятелей своихъ або гостей пословъ пановъ знакомитыхъ выпрохонъ былъ або выправенъ, або тежъ за злый свой учинокъ въ ката въ рукахъ былъ; таковый кождый безчести маеть быти, и промежку добрыми людьми рыцерскими не маеть большей привильевъ шляхецскихъ уживати.

АРТЫКУЛЪ 34.

Хто бы послѣ ранъ по пиромъ и по корчмомъ ходечи пилъ.

Уставуемъ, кгды бы который шляхтичъ битый або ранный послѣ ранъ ѣздилъ або ходилъ по калаціямъ, по торгохъ и по корчмахъ пилъ, на беседехъ седѣлъ, а потомъ отъ тыхъ ранъ умеръ; тогды тот, отъ кого тые раны або бой ему се сталъ, головщизны платити не повиненъ будеть, повиненъ только за раны досыть чинити его кровнымъ подле статуту.

АРТЫКУЛЪ 35.

Такъ званого гостя яко и незваного.

Хто бы тежъ въ домъ свой позвалъ до себе гостя на учту, и былъ такъ небачный а того гостя своего званого въ дому своемъ зелжилъ збилъ або зранилъ, а тотъ бы гость позвавши его до права то на него слушнымъ доводомъ перевелъ, таковый ображоную сторону съ права маеть навезати водле стану его и шкоду платити, на чомъ присягнетъ, а за таковый выступъ маеть седети въ замку нашомъ въ повѣтѣ тамошнемъ, гдѣ оселость маеть, дванадцать недѣль. А естьли бы тотъ гость званый доводу слушного не мѣлъ; тогды маеть того жъ часу скоро по зраненью оказати раны и шкоды свои людемъ стороннымъ околичнымъ суседомъ и обжаловати вряду, такъ тежъ раны оповѣдати и въ книги записати, а при том оповѣданью самъ маеть на ранахъ и на шкодахъ своихъ поприсегнути, а тотъ повиненъ будеть его навезати, седѣнье приняти, и шкоду платити водле того, яко вышей въ томъ артыкулѣ описано. Нижли естли бы гость званый въѣхавши въ чій домъ, былъ такъ вшетечный, господара домового такъ тежъ господыню або сына збилъ або зранилъ; тогды на такового гостя также слушнымъ доводомъ у права маеть довести, а гдѣ бы доводу не мѣлъ, тогды также оповѣдати людемъ стороннимъ и ожаловати, а при оном оповѣданью так стороннимъ людемъ, яко и вряду маеть кождый зъ нихъ зъ особы своее, кого въ дому ранитъ, поприсегнути такъ на ранахъ яко и на шкодахъ. И кгды присягнеть таковый гость домовому господару або жонѣ и сыну, хто зъ нихъ раненъ будеть; ображоной сторонѣ маеть за раны навезати и шкоды, на чомъ присягнеть, платити, а на замку также седѣти дванадцать недѣль. А гдѣ бы се у звадѣ обадва ранили такъ господарь яко и гость, а доводу бы на то зъ обудву сторонъ не мѣли, а торгнули бы се обадва ку присязѣ; тогды жеребей кинути, и чій се жеребей напервей выйметъ, тотъ маетъ на ранахъ и на шкодахъ своихъ присегнути. А гдѣ бы гость въ домъ чій пріѣхавши незваный, а тотъ бы домовой господарь принялъ его въ домъ свой за гостя, и што бы се подъ тымъ же обычаемъ потрафило на обѣ стороне; такъ гостю яко и домовому пану тое жъ право на обѣдвѣ стороне, яко вышей въ томъ артыкулѣ описано.