Статут Великого княжества Литовского 1566 года/Раздел 6

Статут Великого княжества Литовского 1566 года — Роздѣлъ шестой о опекахъ

Дата создания: 1566. Источник: Статут Вялікага княства Літоўскага 1566 года. — Мінск, 2003. — С.35-263. За виданням 1855 року; [1].

РОЗДѢЛЪ ШЕСТОЙ О ОПЕКАХЪ

АРТЫКУЛЪ 1.

О дѣти недорослые лѣтъ.

Уставуемъ, абы по смерти родичовъ дѣтемъ лѣтъ недорослымъ шкоды и роспрошенья маетностей ихъ якъ лежачихъ такъ и рухомыхъ не было; съ тое причыны таковые дѣти лѣтъ недорослые мають быти подъ справою и опатрностью опекуновъ отъ родичовъ назначоныхъ, або тежъ приданыхъ до лѣтъ зуполныхъ, а лѣта мужчизнѣ мають быти зуполные осмнадцать лѣтъ, а дѣвка петнадцать лѣтъ.

АРТЫКУЛЪ 2.

О опецѣ отцовской.

Тежъ уставуемъ, если бы отецъ мѣлъ дѣти недорослые лѣтъ, которые бы мѣли имѣнье материстое обоимъ записаное; тогды якъ дѣтьми самыми отецъ, такъ и таковымъ имѣньемъ ихъ материстымъ и якимъ кольвекъ ихъ властнымъ, опекунъ маеть быти до лѣтъ ихъ дорослыхъ, а кгды лѣтъ доростутъ, маеть имъ тые имѣнья зъ опеки своее пустити, и личбы ни которое имъ чинити не повиненъ. Одно жъ часу опеки своее не мають моцы ничого оныхъ имѣней въ руки чужіе а ни вѣчнымъ а ни заставнымъ правомъ и обычаемъ впущати; а хотя жъ бы и впустилъ, тогды то дѣтемъ шкодити не маеть, але мають того на держачомъ доходити, толко бы давности, вышедши зъ опеки, не омѣшкали. А тежъ кгды бы которого сына его власного имѣнье набытое въ готовыхъ пенезей або якихъ кольвекъ речахъ отецъ за живота своего на свои потребы выдалъ, а потомъ самъ умеръ и колько бы сыновъ зоставилъ; тогды наипервей нижли дѣлъ ровный во имѣнью отчизны межи сынми будеть, мають они долгь отца своего вси сынове съ тымъ посполу братомъ своимъ, чіи речи будуть, межи себе на ровные части розняти, и такъ кождый части своее оный долгь брату своему отложившы, тожъ мають имѣнья отчизные въ ровный дѣлъ подѣлити.

АРТЫКУЛЪ 3.

Которыи опекунами мають быти.

Наипервей тые опекунами мають быти, кого бы отецъ на тестаментѣ дѣтемъ своимъ описалъ, а если бы не описалъ, тогды братъ старшый лѣтъ дорослый маеть молодшую братью и сестрами опекатися. А не будеть ли брата дорослого; ино стрыеве по мечу мають опекунами быти, а если бы стрыевъ рожоныхъ не было, ино близкіе также по мечу ку опецѣ мають быти припущоны. А кгды бы опекуновъ прирожоныхъ никого не было, ино по матцѣ иншые кревные мають быти опекунами; а не станетъ ли покудели кревныхъ, тогды отъ насъ Господара або отъ пановъ воеводъ або тежъ и отъ суду земского мають быти опекуны приданы, не чужоземцы але добрѣ оселые въ томъ же повѣтѣ, гдѣ опекатисе будеть, абы оселость такового опекуна значна была ровна съ тымъ имѣньемъ, которое у въ опецѣ мѣти будеть. И кождый опекунъ хотяжъ бы и кровный также добрѣ оселый маеть быти, кромъ тыхъ опекуновъ которихъ отецъ тестаментомъ назначитъ. А вѣдже если бы тотъ опекунъ отъ отца назначоный неслушнѣ се на той опецѣ справовалъ зъ шкодою оныхъ дѣтей; тогды мы Господаръ або панове воеводове або тежъ врядъ земскій въ повѣтехъ своихъ мають тую опеку отъ того опекуна отнемши, кому съ прирожоныхъ або близкихъ або кому кольвекъ обчому, только цнотливому и добрѣ оселому, тую опеку злецити, и што бы ся шкодъ отъ оного першого въ имѣнью онымъ дѣтѣмъ стало, то все на ономъ опекунѣ съ права сказано быти маеть. А если бы дѣтиные имѣнья въ розныхъ повѣтехъ были, тогды врядъ, въ которомъ повѣтѣ головнѣйшое имѣнье тыхъ дѣтей будеть, маеть опекуна придати; а тотъ самъ одинъ при головнѣйшомъ имѣнью и иные вси имѣнья, хто бы по розныхъ повѣтехъ мѣлъ, будеть съ одного держати и ими се опекати. Тежъ опекунъ маеть быти не вельми зешлыхъ лѣтъ, не форый, ростропный, розумный, тотъ который бы собою добре владнулъ и домъ свой ростропне и опатрне справовалъ.

АРТЫКУЛЪ 4.

Наука опекунамъ якъ мають на себе опеку брати.

Уставуемъ, ижъ кождый опекунъ пріймаючи въ опеку наипервей маеть передъ вознымъ отъ вряду на то приданымъ передъ двома шляхтичами списати достаточнѣ людей и всю маетность дѣтиную, такъ лежачую яко и рухомую, и тотъ реестръ подъ печатью возного и шляхты маеть увести до книгъ земскихъ, и собѣ того уписанья выписъ съ книгъ взяти; а потомъ опекунъ взявшы дѣти маеть ихъ въ добромъ и цнотливомъ выхованью и наукахъ мѣти и въ достатку, водле можности имѣней и водлѣ большого старанья своего, яко ему самому почтивость мѣла, ховати, и маетность ихъ якъ лежачую такъ и рухомую въ цѣлости мѣти, а съ чого бы за долгимъ хованьемъ дѣтемъ шкода быти мѣла, то тые речи на пенези оборочати маеть, и все ку пожитку дѣтиному справовати. А кгды дѣти къ розумнымъ и дорослымъ лѣтомъ прійдуть; пекунови повинни будуть оные вси маетности дѣтиные, якъ лежачіе такъ и рухомые и всякіе доходы зъ имѣнья ихъ, дани пенежныя и медовое и иныя всякія, которіе жъ кольвекъ черезъ весь часъ опеки своее зберуть, ихъ отдати мають, и личбу достаточную вчинивши зо всего усправедливитися. А за працу свою опекунове зъ гумна зъ млыновъ и пересудовъ и зъ озеръ маеть мѣти пожитки и не будуть повинни съ того личбы чынити; вѣдже предсе изъ тыхъ пожитковъ якъ зъ гуменъ такъ и зъ млыновъ мають накладати на выхованье и пріодѣванье дѣтемъ, и службу земскую заступовати. А которимъ житомъ и всякимъ збожьемъ злжонымъ и засѣянымъ опекунъ озметъ, зъ тымъ всимъ опеку здати маеть. Тежъ серебщизны а ни винна себе опекунъ брати а ни ставовъ спускати не маеть, только рибъ изъ ставовъ ку потребѣ своей и къ живности можеть ловити. А которій бы кольвекъ опекунъ, такъ тестаментомъ зоставленый, якъ и прирожоный, або тежъ зъ уряду приданый, не заховуючися водле науки не врядовне безъ возного на то приданого и безъ стороны, несписавшы напродъ всихъ маетностей дѣтиныхъ такъ лежачихъ яко и рухомыхъ, въ опеку вшолъ и што шкоды дѣтемъ опекою своею починилъ; противъ таковому дѣти лѣтъ доросшы близшіе будуть ку доводу, што по тымъ онымъ дѣтемъ дорослымъ лѣтъ справа на ономъ опекунѣ всказано и отправлено быти маеть. А если бы такій опекунъ што опекою своею вшкодившы вмеръ, тогды предся тая шкода на имѣнью его всказана и отправлена быти маеть.

АРТЫКУЛЪ 5.

Если бы опекунъ што несправою або недбалостъю своею дѣтемъ упустилъ.

Кгды бы тежъ опекунъ, такъ прирожоный яко и встановленый отъ отца, або тежъ зъ уряду приданый, якимъ омѣшканьемъ або недбалостью своею дѣтемъ въ молодости лѣтъ ихъ што впустилъ; тогды дѣти, доросшы лѣтъ своихъ зуполныхъ, могуть своего правомъ поискивати на томъ, хто бы имѣнье держалъ, абы одно доросши лѣтъ своихъ зуполныхъ давности земское не омешкали.

АРТЫКУЛЪ 6.

Опекунъ можеть дѣтиное кривды доходити у права, але немоцонъ ничого утратити.

Кгды бы хто сиротамъ або дѣтемъ лѣтъ немаючымъ якую кольвекъ кривду учинилъ; тогды опекунъ ихъ моцонъ того правомъ доискиватися. А кгды бы опекунъ зъ дѣтьми о што былъ позванъ, на то опекунъ не повиненъ у права отповѣдати, окромъ тыхъ причынъ, которые нижей описаны; бо опекунъ неповиненъ дѣтемъ ничого утратити, и што бы опекунъ въ лѣтехъ ихъ недорослыхъ имъ упустилъ, въ чомъ бы се имъ кривда видѣла, тогды они доросши лѣтъ своихъ, могуть о тыхъ кривдахъ своихъ мовити и правомъ того доходити, только бы давности земское не омешкали.

АРТЫКУЛЪ 7.

Хто бы дѣти недорослые до права позвалъ.

Уставуемъ тежъ, ижъ о имѣнья такъ отчизные яко и материстые купленые и выслужоные дѣти а ни опекунъ не будуть повинни у права отповѣдати, але мають тую справу до лѣтъ дѣтиныхъ зуполныхъ отложыти; а они кгды лѣта зуполные будуть мѣти, тогды на онъ часъ сторона жалобливая маеть ихъ припозвати, а они вжо будуть повинни на жалобу отповѣдати не вымовляючися давностью земскую, только бы тежъ сторона жалобливая отъ зуполныхъ лѣть ихъ давности земское не премѣшкала.

АРТЫКУЛЪ 8.

Ижъ дѣти недорослые не мають у права отповѣдати въ одно чотырохъ причынахъ.

Тежъ дѣти не маючы лѣтъ, будучы до права позвани, одно въ чотырохъ речахъ повинни будуть отповѣдати. Первей, кгды отецъ ихъ або матка за доброго здоровья которое имѣнье лежачое въ пенязехъ заставнымъ обычаемъ держали, або якъ кольвекъ суму на томъ имѣнью было имъ описано, а близкіе бы тое имѣнье отъ тыхъ дѣтей выкупити хотѣли, и для того бы были позвани ку обранью пенезей; тогды будуть повинни пенези взяти черезъ опекуна або тежъ черезъ пріятелей кровныхъ, а имѣнье пустити. Другое, кгды бы отецъ ихъ кому ручылъ о якую кольвекъ речъ, а о тую бы поруку еще отецъ ихъ за жывота своего былъ позванъ до права; тогды по смерти отцовской дѣти, будуть ли отъ кого позвани, отповѣдати повинни, и съ права найдеть ли се, то мають его съ поруки вызволити. Третее, кгды бы отецъ за жывота своего о якое дѣдицство мѣлъ право и не доконавшы умеръ; тогды дѣти черезъ опекуна повинни будуть отказовати, а если бы одно позванъ былъ, а у права не стоялъ, тогды тая речъ маеть отложона быти до лѣтъ дѣтиныхъ. Четвертое долгъ отца своего повинни дѣти платити не вымовляючися молодостью.

АРТЫКУЛЪ 9.

О братьи недѣльной.

Уставуемъ, кгды бы братья недѣльная маючы лѣта дорослые одного въ имѣнью зоставили, а онъ яко старшый мѣстцу зоставленый былъ бы ку праву позванъ, а сполную речъ свою и братьи своее утратилъ; тогды иншая братья его рожоная не маючы моцы такового судовного выроку у права отмѣнити ани поправляти, але што черезъ брата своего утратили, о то на вѣки мають молчати. А кгды бы одному брату лѣта зуполные маючому имѣнье его отъ братьи молодшое отъ опекуновъ въ руки пришло, а былъ бы позванъ о которую кольвекъ речъ о имѣнье, або о што кольвекъ, повиненъ отповѣдати у правѣ ни ждучи лѣтъ братьи своее молодшое; ачкольвекъ правомъ дойдеть, то съ братьею, кгды лѣтъ доростутъ, ровно дѣлити будуть повинни; а если тежъ што правомъ утратитъ, того братьи нагорожати не будетъ повиненъ, а ни братья будуть мочи того на братѣ своемъ ани на томъ, хто зыщеть правомъ, поискати; а вѣдьже если бы братъ которую хитростыо або недбалостью своею што ку шкодѣ братьи своее пустилъ, а то бы братья на него у права довели, тогды тотъ братъ, который што не слушнѣ упустилъ, маеть братьи съ части своее нагородити.

АРТЫКУЛЪ 10.

Старшій опекунъ не можеть имѣнья дѣтиного продавати, утратити и граничити.

Уставуемъ, ижъ опекунъ не можеть имѣнья дѣтиного, которимъ ся опекаеть, продати або якимъ же кольвекъ обычаемъ утратити и тежъ граничити; а если бы опекунъ иначей учинилъ, тогды дѣти дошедши лѣтъ зуполныхъ будуть мѣти моцъ имѣнье свое отъ того, хто его уживаеть, правомъ доходити, одно бъ дошедши лѣтъ зуполныхъ давности земское не омѣшкали.

АРТЫКУЛЪ 11.

Старшый сынъ дорослый не можеть братьи недорослое имѣнья отдаляти або завести, окромъ части своее, лечъ бы для долговъ родичовъ своихъ.

Уставуемъ, ижъ старшый братъ держачы сполное имѣнье зъ братьею своею нероздѣльное не будеть мѣти моцы якимъ же кольвекъ мененымъ обычаемъ того сполного имѣнья заставляти продавати отдаляти або утрачати, вынемшы часть свою, которая на него приходить, можеть зоставити до вѣчного дѣлу. А гдѣ бы тежъ долги того родичовъ ихъ записаные або правомъ належачые потребовали, въ которой же потребѣ тотъ братъ старшый, зъ вѣдомостью а порадою старшихъ пріятелей дому своего, будеть маючи имѣнье сполное братьи зоставити, о такіи долги платити, а вѣдьже такъ яко бы пенези на имѣнье братьи своее взятые не превышали сумы долговъ отцовскихъ. А если бы долги або заплата якая судовнѣ сказаная при меньшымъ была; тогды старшый братъ, первей огледавшы живностей и иные потребы домовые, маеть съ цыншовъ доходовъ имѣней сполныхъ долги оные малые плати, а останокъ, што бы збывало, маеть вѣрне братьи заховати; а если бы иначей чинилъ, тогды такового заставованье або записованье имѣней у права пріймовано быти не маеть; а братья, которихъ имѣнья тымъ або якимъ инымъ неслушнымъ способомъ будуть заставлены, кгды лѣтъ своихъ доростутъ и давности не замолчать, будуть мочы его правомъ доходити; а той, которій бы противъ уставы нашое пенези на имѣнье братское безъ ихъ зуполного дозволенья такъ неопатрнѣ далъ, тогды своихъ пенезей на ономъ старшомъ братѣ доходити искати будеть. А кгды бы которій дорослый былъ на службѣ у чужихъ краинахъ або на науцехъ або у везанью непріятельскомъ, тому давность не шкодить, естли ее отъ пріѣханья своего не замолчитъ. А вѣдьже и на свою часть будеть ли хотѣти братъ старшый якую суму пенезей взяти, тогды маеть такъ брати, яко бы сума не превышала, а на вѣчность, не роздѣлившы имѣнья съ братьею своею, части своее продавати не можеть.

АРТЫКУЛЪ 12.

Въ опецѣ, тое имѣнье держечи, не маетъ ничого зъ него за свою вину платити.

Коли бы хто чужое имѣнье въ опецѣ або заставѣ держалъ, а были бы якіе кривды суседскіе або долги або якіе иные справы покананье; таковый кождый, если бы не былъ на своей властности оселый, въ таковыхъ своихъ речахъ въ сужоныхъ на рухомомъ имѣнью его або въ недостатку заплаты на самомъ истцу^[1] маеть быти отправлена^[2].

1. Первой ред. стат.: «на персонѣ его».
2. Трет. ред. стат. «а имѣнье, которое бы у вопецѣ держалъ, отъ того вольно будетъ».

АРТЫКУЛЪ 13.

Коли бы ся трафило екзекуторови оборонцы, почавшы которіе справы тестаментовъ справовати, и недоконавши умерли.

Уставуемъ, ижъ кгды бы ся опекунове почавши тестаментомъ справовати што кольвекъ, а въ томъ не докончившы померли; тогды близкіе оныхъ дѣтей мають быти припущоны ку екзекуціи, а естли близкихъ не будеть, ино врядъ опекуновъ, хотя бы обчихъ, до того тестаменту подъ тою жъ моцъю все справовати, якъ и тые, которые померли.