Страница:Летопись самовидца о войнах Богдана Хмельницкого (1846).djvu/60

Материал из Викитеки — свободной библиотеки
Перейти к навигации Перейти к поиску
Эта страница была вычитана


бы переправовалъ Днѣпръ зъ войсками. Аже Дорошенко видячи же орда становится зичливѣйша бути запорожцамъ, а нѣжѣли ему, не пошолъ самъ зъ войскомъ, але послалъ брата своего рожоного Григорія, злецивши ему войска. Аже покуля наспешили войска Запорожскіе и Татарскіе Демко Многогрѣшный учинилъ згоду зъ княземъ Ромодановскимъ. О которыхъ войскахъ татарскихъ и козацкихъ узявши вѣдомость князь Ромодановскій послалъ подъездъ зъ сыномъ своимъ Княземъ Андреемъ, которыхъ напавши Татаре у Гайворонѣ погромили и сына князя Ромодановскаго узяли, и такъ самъ князь оборонною рукою отступилъ до Путивля, которому болшей жадной шкоды Татаре и козаки не могли учинити и наступила стужа же уже не пора военная. Запорожцѣ зъ ордами повернули въ Кримъ, а Григорій видячи, же уже приходятъ до згоды знову Заднѣпране зъ Москвою, уступилъ зъ войсками своими ку Каневу и уже безпечней почалъ Многогрѣшный трактовати зъ Москвою.


РОКУ 1669.

Демко Многогрѣшный будучи наказнымъ гетманомъ отъ Дорошенка за тое поставленъ, же онъ наипершей отступилъ отъ Бруховецкого зрадивши его, а хочай Бруховецкій марне згинувъ, на тое неуважаючи, жебы и его тое неспоткало, себѣ гетманства зичачи назбиралъ компанѣи зъ Литвы Ляховъ и иныхъ не мало жебы оному зичливыми быти и изобравши усю старшину поблизъ себѣ заднѣпрскую до Новгородка и приказалъ онымъ же бы себѣ цалаго гетмана настановили, несподѣваючися на оборону гетмана Дорошенка, що старшина будучи удворѣ зачиненна, которыхъ омаль, а при Многогрѣшномъ не мало его компаніи и боячися болшей що мовити, але пойшовши гуртомъ просили его Многогрѣшного, жебы онъ надъ ними гетманомъ былъ, чого онъ отмовлялся якъ старая дѣвка хорошого жениха. Бо того самъ требовалъ. И позволився на тое которому и присягу выконали на послушенство; итакъ заразъ пословъ своихъ до Е. Ц. В. послалъ; просячи жебы знову приняти были по прежнему, що и одержали. Знову рада была въ Глуховѣ, на которой князь Ромодановскій былъ и статіѣ новіе постановили. И отъ того часу уже воеводамъ приказано, жебы ни вощо не втручалися, и воеводы тылько въ Кіевѣ, Чернѣговѣ, Нѣжинѣ, въ Переяславлю зоставали, и то ничого не беручи у людей, але усе на гетмана злеценно, и тамъ знову присягу выконали на подданство Е. Ц. В-ву. И отъ того часу Демко гетманъ усе Заднѣпре кгвалтомъ до себе приворочалъ, турбуючися болшей року, поколя усѣ городы до него ся прихилили. Тоей же зимы видячи Дорошенко гетманъ же орда кримская почала прихилятися до Запорожцовъ и ему незичливо ся становити, умыслилъ тое зъ своѣми совѣтниками жебы ся цале поддати Турчинови, якъ Волохи и Мултяне, и послалъ зъ темъ пословъ своихъ Портянку просячи о Санджака. На которое

Тот же текст в современной орфографии

бы переправовал Днепр з войсками. Аже Дорошенко видячи же орда становится зичливейша бути запорожцам, а нежели ему, не пошёл сам з войском, але послал брата своего рожоного Григория, злецивши ему войска. Аже покуля наспешили войска Запорожские и Татарские Демко Многогрешный учинил згоду з князем Ромодановским. О которых войсках татарских и козацких узявши ведомость князь Ромодановский послал подъезд з сыном своим Князем Андреем, которых напавши Татаре у Гайвороне погромили и сына князя Ромодановского узяли, и так сам князь оборонною рукою отступил до Путивля, которому болшей жадной шкоды Татаре и козаки не могли учинити и наступила стужа же уже не пора военная. Запорожце з ордами повернули в Крим, а Григорий видячи, же уже приходят до згоды знову Заднепране з Москвою, уступил з войсками своими ку Каневу и уже беспечней почал Многогрешный трактовати з Москвою.


РОКУ 1669.

Демко Многогрешный будучи наказным гетманом от Дорошенка за тое поставлен, же он наипершей отступил от Бруховецкого зрадивши его, а хочай Бруховецкий марне згинув, на тое неуважаючи, жебы и его тое неспоткало, себе гетманства зичачи назбирал компанеи з Литвы Ляхов и иных не мало жебы оному зичливыми быти и изобравши усю старшину поблиз себе заднепрскую до Новгородка и приказал оным же бы себе цалого гетмана настановили, несподеваючися на оборону гетмана Дорошенка, що старшина будучи удворе зачиненна, которых омаль, а при Многогрешном не мало его компании и боячися болшей що мовити, але пойшовши гуртом просили его Многогрешного, жебы он над ними гетманом был, чого он отмовлялся як старая девка хорошого жениха. Бо того сам требовал. И позволився на тое которому и присягу выконали на послушенство; итак зараз послов своих до Е. Ц. В. послал; просячи жебы знову приняти были по прежнему, що и одержали. Знову рада была в Глухове, на которой князь Ромодановский был и статие новие постановили. И от того часу уже воеводам приказано, жебы ни вощо не втручалися, и воеводы тылько в Киеве, Чернегове, Нежине, в Переяславлю зоставали, и то ничого не беручи у людей, але усе на гетмана злеценно, и там знову присягу выконали на подданство Е. Ц. В-ву. И от того часу Демко гетман усе Заднепре кгвалтом до себе приворочал, турбуючися болшей року, поколя усе городы до него ся прихилили. Тоей же зимы видячи Дорошенко гетман же орда кримская почала прихилятися до Запорожцов и ему незичливо ся становити, умыслил тое з своеми советниками жебы ся цале поддати Турчинови, як Волохи и Мултяне, и послал з тем послов своих Портянку просячи о Санджака. На которое