в книге Жезле правления в возобличении в 23-м. А во окончании того поучения положих из тоя же книги возобличение 30 о молитве: Господи Іисусе Христе, Боже наш, помилуй нас.
Того же дни Воздвижения честного креста к вечерни народом собравшымся и слушавшым вечернего пения глагола архимандрит Игнатий черниговскому протопопу Іоанну Іоаннову, да речет по указу великих государей и святейшего патриарха слово утешения к людям, и той послушав протопоп и взем книгу святого еуангелиа воскресного в толковании оставшую часть дне того и прочет с рассуждением и в том поучении много от писаний приведе о добродетелном житии и дабы отступником Капитоном не последовали, возвещая им некогда и свое противление и како милосердием Божиим от того свободися и како и от чад своих духовных уведав многую их капитонскую лесть, и сего ради моляше в поучении, дабы ни како же от церкви отбегали, но непрестанно бы в ней пребывали. И в том поучении привел о погибели галилеан, писанной во еуангелии от Луки святого зачал 70, их же кровь смешена с жертвами, и аще не покаются, то и капитонове такожде погибнут, и да бы того не пострадати господствует им приити ко святой церкви и покаянием себе милостивого Бога сотворити. И посем скончав поучение.
И после того поучения востав архимандрит и став посреде церкве возгласи еще: слушасте, возлюбленнии христиане, словеса божественных писаний, яже изрече священный протопоп, яко велми ползующая ко спасению, потщитеся убо не точию слышати, но и творити я, яко глаголет божественный глас: Блажени слышащии слово Божие и творяще е; и апостол: несдлышателие бо закона, но творцы оправдятся пред Богом.
И посем архимандрит начат глаголати им о начале крещения Российския земли и како восприят крещение святый князь Владимир в Корсуне и како святые иконы и святый крест корсунский четвероконечный принесе из Корсуня и той святый крест и до ныне в соборней церкви на Москве. И повесть учиних, чесо ради у нас римляне прокляти, яко еретического ради их учения и прилога в символе и в приношении опресноков вместо квасного хлеба. И посем и паки на расколников въкратце о четвероконечном кресте, и о молитве Іисусове, и о сложении перстов, и о сожигательстве их, от апостольского еуангелиа: (Маф: 52): Еже соберите первее плевелы и свяжите я в снопы, яко сожещи я, яко то слово о них исполнися, понеже на овинах суть снопы и они тамо сожигаются; и паки во еуангелии (Маф: 61): Аще слепец слепца водит не оба ли в яму впадета, а под овином суть ямы, и тое паки о них же капитонах исполнилося.
