Чтожъ таковый превосходный мужъ получилъ во отечествѣ своемъ неблагодарномъ, отъ того лютаго и безчеловѣчнаго Царя? То: нѣцы глаголютъ, аки бы воспомянулъ нѣчто о мнѣ[1] ему… онъ же, глаголютъ, восклехталъ яко дивій вепрь,[2] и возскрежеталъ неистово зубами своими, и абіе повелѣлъ таковаго святаго мужа въ рѣцѣ утопити. И сице пріялъ мученичества вѣнецъ и получилъ второе крещеніе, его же и Господь нашъ Іисусъ Христосъ по крещенію Іоанновѣ возжелѣлъ, яко самъ рече: „Коль, рече, желаю чашу сію пити и крещеніемъ симъ креститись!“ А нѣцыи глаголютъ о скончанію его, приходящіе ото оныя земли, аки бы тихою и спокойною смертію о Господѣ почилъ онъ святый мужъ. Азъ же истиннѣ не могъ достаточнѣе вывѣдатися о смерти его, аще и со прилежаніемъ о томъ вывѣдахся; яко слышахъ отъ нѣкоторыхъ, тако и написахъ, въ странствѣ будучи, и долгимъ разстояніемъ отлученный и туне отогнанный отъ оныя земли любимаго отечества моего.
А еже всѣхъ[3] по ряду не написахъ о немъ: яко выше рекохъ, ово ко краткости Исторіи зряще, ово здѣ живущихъ грубыхъ и въ духовныхъ отнюдь неискусныхъ, къ тому и маловѣрныхъ ради человѣковъ; и аще Богъ поможетъ, и обрящемъ нѣкоторыхъ духовныхъ мужей, желающихъ сего, тогда мало нѣчто воспомянемъ о преди-
