ПЕ́РВЫЍ КНИ́ГИ МОИСЇѠВЫ БЫТЇꙖ.
Глⷡ҇а, а҃.
Иско́ни сътворѝ бг҃ъ нб҃о и҆ ꙁе́млю. ꙁемлѧ́ же бѣ҆ неви́дима и҆ неѹ҆кра́шена. и҆ тма̀ ве́рхꙋ беꙁ꙽дны. И҆ дх҃ъ бж҃їи ноша́шесѧ ве́рхꙋ воды̀. и҆ реⷱ҇ бг҃ъ, да бꙋ́детъ свѣтъ, и҆ бысть свѣтъ. И҆ ви́дѣ бг҃ъ свѣтъ ꙗ҆ко добро̀. И҆ раꙁлꙋчѝ бг҃ъ ме́ждꙋ свѣтом꙽ и҆ ме́ждꙋ тмо́ю. И҆ наречѐ бг҃ъ свѣт꙽ дн҃ь, а҆ тмꙋ наречѐ но́щь, и҆ бысть ве́черъ и҆ бысть ѹ҆́тро дн҃ь е҆ді́нъ. И҆ ре́че бг҃ъ да бꙋдетъ тве́рдь посредѣ̀ воды̀, и҆ бꙋдетъ разлꙋча́ѧ посредѣ воды̀ и҆ воды̀, и҆ бысть та́ко. И҆ сътворѝ бг҃ъ тве́рдь. и҆ разлꙋчѝ бг҃ъ ме́ждꙋ водо́ю, ꙗ҆́же бѣ҆ поⷣ тве́рдїю. и҆ посредѣ воды̀, ꙗ҆́же бѣ҆ наⷣ тве́рдїю. и҆ наречѐ бг҃ъ тве́рдь нб҃о. и҆ ви́дѣ бг҃ъ ꙗ҆ко добро̀. и҆ бысть ѹ҆́тро дн҃ь вторый. И҆ ре́че бг҃ъ, да събере́тсѧ вода̀ ꙗ҆́же поⷣ нб҃семъ, въ совокꙋпле́нїе е҆ді́но. и҆ да ꙗ҆́ви́тсѧ сꙋша, и҆ бысть та́ко. И҆ събра́сѧ вода̀ ꙗ҆́же поⷣ҇ нб҃семъ въ со́нмы своѧ̀, і҆ ꙗ҆́ви́сѧ сꙋша. И҆ наречѐ бг҃ъ сꙋшꙋ ꙁе́млю, а҆ соста́вы водны́ѧ наречѐ мо́ре и҆ ви́дѣ бг҃ъ ꙗ҆́ко добро̀. И҆ ре́че бг҃ъ, да прорасти́тъ ꙁе́млѧ бы́лїе тра́вное, сѣю́ще сѣмѧ по ро́ду и҆ по подобїю, и҆ дре́во плодови́то творѧ́щее пло́дъ, е҆мꙋ же сѣмѧ е҆го въ немъ по ро́ду на ꙁе́мли, и҆ бысть та́ко. І҆ и҆ꙁнесѐ ꙁе́млѧ бы́лїе тра́вное, сѣю́ще сѣмѧ по ро́ду и҆ по подо́бїю и҆ дре́во плодови́то творѧ́щее пло́дъ, е҆мꙋ же сѣмѧ е҆го въ немъ по ро́ду на ꙁе́мли, и҆ ви́дѣ бг҃ъ ꙗ҆ко добро̀. и҆ бысть ве́черъ и҆ бысть ѹ҆́тро дн҃ь тре́тїи. И҆ ре́че бг҃ъ, да бꙋдꙋтъ свѣти́ла на тві́рди нбⷭ҇нѣи, освѣща́ти ꙁе́млю, и҆ раꙁлꙋча́ти ме́ждꙋ дн҃емъ и҆ ме́ждꙋ но́щїю. И҆ да бꙋдꙋтъ въ ꙁнаме́нїѧ и҆ въ врѣмена̀, и҆ въ дн҃и и҆ въ лѣта. И҆ да бꙋдꙋтъ въ просвѣще́нїе на тве́рди нбⷭ҇нѣи, ꙗ҆ко свѣти́ти по ꙁеⷨлѝ и҆ бысть та́ко. И҆ сътворѝ бг҃ъ двѣ҆ свѣти́лѣ вѣли́це свѣти́ло вѣли́кое, въ нача́токъ дн҃и. свѣти́ло же менъшее, въ нача́токъ но́щи и҆ ѕвѣзды. И҆ поставѝ их꙽ бг҃ъ на тве́рди нбⷭ҇нѣи, ꙗ҆ко свѣти́ти по ꙁемлѝ, и҆ владѣти дн҃ем꙽ и҆ нощїю. И҆ раꙁлꙋча́ти ме́ждꙋ свѣтоⷨ и҆ межⷣꙋ тмо́ю. И҆ ви́дѣ бг҃ъ ꙗ҆́ко добро̀, и҆ бысть ве́черъ, и҆ бысть ѹ҆́тро, дн҃ь четве́ртыи. И҆ ре́че бг҃ъ, да и҆ꙁведꙋтъ во́ды, га́ды дш҃ъ живы́хъ, и҆ пти́цы лѣта́юща на ꙁемлѝ, по тве́рди нбⷭ҇нѣи, и҆ бысть та́ко. И҆ сътворѝ бг҃ъ ки́ты вели́кїа, и҆ всѧ́кꙋ дш҃ꙋ животныⷯ гаⷣ, и҆ ꙗ҆́же и҆ꙁведо́ша во́ды поро́дꙋ и҆хъ, и҆ всѧ́кꙋ пти́цꙋ перна́тꙋ поро́дꙋ. И҆ ви́дѣ бг҃ъ ꙗ҆́ко добро̀. И҆ блⷭ҇ви ѧ҆̀ бг҃ъ гл҃ѧ, ра́ститесѧ и҆ множи́тесѧ, и҆ напо́лните во́ды ꙗ҆́же въ мо́рѣхъ, и҆ пти́цы да ѹ҆мно́жатсѧ на ꙁемлѝ. И҆ бысть ве́черъ, и҆ бысть ѹ҆́тро, дн҃ь пѧ́тыи. И҆ ре́че бг҃ъ, да и҆ꙁведеⷮ ꙁемлѧ̀ дш҃ ꙋ живꙋ поро́дꙋ четвероно́га и҆ га́ды, и҆ ѕвѣ́рѧ ꙁемлѝ поро́дꙋ и҆ ско́ты поро́дꙋ и҆хъ. И҆ ви́дѣ бг҃ъ ꙗ҆́ко добро̀. И҆ ре́че бг҃ъ, да сътвори́мъ чл҃ка поо҆́браꙁꙋ на́шемꙋ, и҆ подо́бїю.
