А в погребех, и на ледниках, и на погребицахе[1], хлебы, и калачи, сыры, и яйца, забела, и лук, чеснок, и мясо всякое свежее, и солонина, и рыба свежая, и просолная, и мед пресной, и ества вареная, и мясная, и рыбная, и всякой запас естомой[2], и огурцы, и капуста, соленая и свежая, и репа, а всякие овощи, и рыжики, и икра, росолы ставленые, и морсы[3], квасы яблочные; и воды брусничные, и вина фряские[4], и горючие[5], меды всякие, и пива, — сыченые, и простые, и брага, — и всякаго того запасу ключнику ведати; и сколко чего на погребе[6] поставлено, и на леднике, и на погребце, — всеб то сочтено было, и перемечено: что в полне и что не в полне; и перемечено[7], и записано: и сколко куды чего отдаст по приказу государеву, — и сколко чего разойдется; то б было все в счете, — было б что государю сказати, и отчет во всем дати; а всеб то было чисто, и в покрыте, и не затхлося, и не заплесневело[8], и не прокисло; а вина фряские, и сыченые, перевара, всякое лутчее питие, в оприченном[9] погребе, за замком держати; а сам бы тамо ходил.
Примечания[править]
- ↑ Арх. и Цар. = погребцах.
- ↑ Арх. = съестной. Пог. Цар. = естовной.
- ↑ Арх. Пог. Цар. и вишневой в патоке, и малиновой; и яблоки, и груши, и дыни, и арбузы в патоке, и сливы, и лимоны, и левашники, и пастилы.
- ↑ Пог. = фряжкие.
- ↑ Арх. Пог. Цар. = горячие.
- ↑ Конш. = погребице.
- ↑ Арх. Цар. и перемерено.
- ↑ Ibid. и не текло, и не изгибло.
- ↑ Конш. = опришенном.
