боязни собе пасуще, облаци безводніи, всякому вѣтру приносими, и древеса есенная безплодна, звѣзды прелестны, имъже мракъ тмы въвѣкы блюдется.» Таковая и множайшая сихъ поучаетъ насъ Іуда добрый. Пріиди убо, Павле, съсуде избранный, рци намъ о настоящемъ времени, яви затаеныя волкы, обличи, объяви тати и разбойникы святыя паствы Божія. Павелъ рече: «блюдитеся, еда кто вы есть крадоводяй хитростію и тщею лестію.» И индѣ пакы: «ученми различными странными не обдержитеся.» И пакы: «лукавіи человѣци и волхви преспѣвають, на горшее прелщающе, прелщаеми.» И индѣ пакы глаголетъ: «осквръненымъ же и невѣрнымъ ничтоже чисто.» Услышите вси, иже любви съ ними творяще, како убѣжати вамъ отъ гнѣва грядущаго на нихъ? Иже съ ними соводворяющеся и осквръняющеся въ пищи, или въ питіи, или въ любовной дружбѣ, како смѣете приступити къ божественымъ и страшнымъ тайнамъ Христовымъ? Умолимъ ли убо васъ, лии вътще тружаемся, или къ въздуху словеса сія глаголемъ? Обаче же ради спѣшащихъ слышати слово благо и творити, не престану глаголъ сихъ вѣщати. Услышите блаженаго Павла глаголюща: «не можете чашу Господню пити и чашу бѣсовскую; изыдите отъ среды ихъ и нечистотѣ не прикасайтеся. Что ли пріобщеніе свѣту къ тьмѣ»? Гдѣ суть нынѣ, иже свѣрѣпа уста имуще и суетословци, незнающе божественая Писанія, ихъже Богъ чрево и слава, иже земная мудрьствующіи? Таковая Павелъ поучаеть и утѣшаеть и наказуеть, Павелъ съсудъ избранъ, предѣдъ церковный, многострадалецъ доблественъ, благовѣщанная цѣвница, Христовъ проповѣдникъ и спасатель велѣніемъ, труба слову и вѣщатель благочестью и языкомъ ловецъ. Рци, блаженне Петре, егоже ублажи блаженый Богъ и Господь нашъ Іисусъ Христосъ, отъ прелщающихъ и хотящихъ прелстити Христово стадо, его же ти предасть и ввѣри ти Началникъ пастыремъ и посѣтитель душамъ нашимъ, рци, елика ти Духъ Святый подалъ есть, и утвръди свое стадо, покажи и открый всѣмъ православнымъ потаеныя волкы, якоже Наставникъ твой Христосъ Господъ. Петръ рече: «се преже разумѣйте, яко пріидуть на послѣдняя дни поругателѣ, по своимъ ихъ желаніемъ ходяще.» И пакы глаголеть: «въ васъ будутъ лживіи учителіе, иже превратятъ худоумныя въ ереси погыбелныя, искупившаго ихъ Владыкы отрекутся, и мнози послѣдуютъ ихъ нечистотамъ, имъ же грѣхъ не медлѣетъ и погыбель ихъ не дремлетъ, клятвѣ чада, оставлше правый путь.» Сія Петръ вѣщалъ есть, Петръ блаженый поистинѣ, Петръ камень вѣрѣ, на немъ же основа Христосъ церковь свою, Петръ иже ключы небесныя держа, Петръ иже по волнамъ морскымъ пѣшь ходивый, теплый рачитель Христовъ, иже Симона волхва въ Римѣ низверже, яко верховникъ и предстатель, перваго разбойника и татя и ученика діяволя въ ересѣхъ. Господь же рече: «блюдитесь, да не кто васъ прелстить, яко время близъ есть.» Нынѣ паста, и вси зримъ слугы діяволскыя. Таже хотя научити хотящихъ предстателемъ быти церквамъ Божіимъ, како достоитъ имъ отгоняги мятежетворники церкви Божіа, створи плеть отъ верви, и вниде, всѣхъ изгна отъ Святилища, продающая и купующая, и отрину, и отгна, глаголя: «домъ мой, домъ молитвеный есть, вы же створисте его вертепъ разбойническы.» Услышите вы, предстатели церквамъ Божіимъ нынѣшняго времене: вамъ бо показа добра образа, яко да послѣдуете, и въ слѣдъ его блюдѣтеся опаснѣ, волкы отгоняюще, таже изгоняя иже спротивная мудрьствующихъ церкви Божіи и дѣющихъ, глаголя: «се оставляется домъ вашъ пустъ.» Зриши ли, како словеса и дѣломъ събышася? Врази бо и навѣтници цер-
