кви Божіи, (рекше, разсѣкателѣ и мятежотворци, въ всякомъ родѣ пагубѣ предани бываютъ, по Господню словеси, еже рече: «яко всякъ садъ, егоже не насади Отець мой небесный, искоренится», еже и бысть. Самъ бо первѣе св створи и указа̀; а по еже на небеса възнесеніи, блаженіи Апостоли съставиша[1] на нихъ. По сихъ же, и божественая ученія, и церковніи учителіе, и еже о временѣхъ бываеміи святіи Вселенстіи Сбори искорениша и пагубѣ предаша, по писаному: «яко погубиши вся глаголющая лжю.» Тѣмъже убо вси изчезоша и погыбоша, ради беззаконія своего. Гдѣ убо суть, иже нѣкогда церковь Божію, гонящіи царіе, силници, мудрьци и мятежотворци? Не расточиша ли ся и разрушишася и погыбоша, ни въ чтоже быша, о нихъ же въпіетъ церковь Божія: «яко обыдоша мя яко пси мнози»? Не вси ли погыбоша, расточившеся, ради хуленія своего, и изгнани быша яко волци? Обрѣтошася бо подвижници и добльственіи поборници, и въистину пастыріе, иже тогда предстоящіи церквамъ Божіимъ, блаженіи они святіи мужіе. Но разньствуетъ тогдашнихъ пастырь паче нынѣшнихъ: они бо бѣша ратници, поборници божественыхъ и священныхъ правилъ и о овцахъ Христовѣхъ; сіи же чреву угодници и бѣгуни, яко наемници, оставльше овци и побѣжавше; они же душа своа положиша за овца, подражающе пастырю доброму, Господу нашему Іисусу Христу. О блаженныхъ онѣхъ и святыхъ мужѣхъ,[2] ихъ же имена въ книзѣ животнѣй, отъ нихъ же ужасошася бѣси и въстрепеташа преступници, реку же убо азъ подобная Давиду, иже рыдая глаголаше: «гдѣ суть милости твоя древняя, Господи?» Реку же убо азъ съ слезами: гдѣ есть блаженный онъ ликъ святыхъ Епископъ и учитель, иже за, божественая и священая правила святыхъ Апостолъ себе тмочисленѣ на смерть предаша? Что же възбраняетъ, аще въ средь сихъ приведу оть многыхъ малая, ибо еже помянути ихъ, освященіе есть души? Гдѣ Василіе Великый, вмалѣ Апостоломъ равностоятель? Гдѣ Аѳанасіе, святое Божіе жилище? Гдѣ Григоріе, вторый Богословъ сладцѣйшій и благоразумнѣйшій, и непобѣдимый Христовъ воинъ на нечестивыя, и сему съединоименитый? Гдѣ Іоанъ, иже языкомъ златый сый, наказоводець унывающихъ, утѣшеніе скорбящимъ, руководець кающимся, иже на хулникы оружіе сый обоюду остро, приателище добродѣтелемъ, Святаго Духа обитель? Видите ли, чада моя, колика разность божественыхъ святыхъ мужей оныхъ паче окаанныхъ, иже нынѣ сущихъ? Вѣмъ и иныхъ богоносныхъ учитель, но довлѣетъ къ нынѣшнему. Обаче же они душю о овцахъ, якоже предиречеся, положиша; сіи же, оставльше свое поношеніе, паству Христову предаша волкомъ, не вѣдяще, яко аще овца едина погыбнетъ, бывши звѣрохыщна отъ нашего небреженія, кровь ея[3] отъ рукъ нашихъ взыщеть Судія, и Апостолу глаголющу: «яко въ послѣдняя времена отъ вѣры отступять нѣціи, внимающе духовомъ прелести и ученія бѣсовскымъ человѣкомъ»; и пакы глаголеть: «будетъ время, егда здраваго наученія не пріимутъ, но по своему ихъ желанію, сами собѣ зберутъ учитель, иже лукавыми духми поставляеміи и отъ нихъ сдѣваеміи, предтечи антихристу будутъ, спротивному ученици, и своими нечестивыми велѣнми прелстятъ и погубятъ и безчествуютъ людство, богатое благости, къ угожденію сына погыбели.» Сего ради, множицею въспомянув-
