ре и молодые люди суженые то (?) межъ Дону и Непрядвы на поле Куликове и на Непрядве положили есте головы своя за святыя церкви и за землю Рускую и за вѣру Хрістіанскую. Простите, братия, отъ мала и до велика, в семъ вѣце и в будущемъ! И рече Князь Великіи Дмитрей Ивановичь брату своему Князю Владимеру Андрѣевичу: „Пойдемъ, брате, во свою землю Залѣскую к славному граду Москвѣ и сядемъ на своемъ Княженіи на вотчине и на дѣдине! аз чести есмя себе улучилъ и славнаго имени.“ И рече Князь Великій брату своему и Княземъ Литовскимъ: Братия моя, пѣнию время, а молитве часъ; праздникъ приспѣ всемирнаго воздвижения Честнаго Креста.‘‘ И повелѣ всему войску за реку возитись, и пойде Князь Великій по Резанской земли. Слышавъ то Олегъ Резанскій, яко идетъ Князь Великій Дмитрей Ивановичь, побѣдивъ своя враги, и нача плакати и блюстись: „О горе мнѣ грѣшному отступнику Хрістову! язъ поползохся, что видех? к безбожному Царю Мамаю присягу имѣлъ“. И избеже из града своего Резани и побеже к Олгерду Литовскому и приіде на рубежъ Литовскій, и тут ста и рече бояромъ своимъ: „Азъ хощу тут ждати вѣстника, какъ Князь Великій пройдетъ землю мою і прииде во свою вотчину и аз тогды возвращусь во свояси“ Князь же Великій Дмйтрей Ивановичь идучи по Резанской земли, заповѣда всему войску своему: „аще кто идетъ по Резанской земли: то ни единому класу не коснитеся.“ Пройде же Князь Великій Дмитрей Ивановичь землю Резанскую и не повелѣ ни единому класу коснутися. Пойде же Князь Великій на землю свою к славному своему граду Москвѣ. Вѣстницы ж ускоряюще к священному Епіскопу Еуѳимію на Коломну, яко идетъ Князь Великиі Дмитрей Ивановичь, побѣдивъ своя враги, на свою отчину возвратися. Священный же Епископъ повелѣ по всѣмъ церквамъ молебны пѣти за Великаго Князя и за все Хрістолюбивое воинство. Прииде Князь Великиі на Коломну з Дону в осмый день на память Святаго Апостола Кодрата. Свя-
