[36]27. — 1657, въ октябрѣ. Письмо Польскаго полковника Себастіана Маховскаго къ Крымскому Камамбетъ мурзѣ.
Мой ласкавый пане Камамбетъ-мурза, мой вельце мсци пане и брате! Жалую того, жемся не видѣлъ зъ вмс., моимъ мсци паномъ, на тотъ часъ, коли его милость панъ маршалокъ бывъ у хана его милости; теперъ мой поклонъ посылаю а доношу до вѣдомости, же теперъ тое осени уже не може быть зъ нашей инъ прези (sic, промысловъ) ничого, бо Господь Богъ посчастилъ королеви его
милости, пану моему милостивому, и зо всею потугою, зъ войскомъ короля Венгерского пошовъ до Нѣмцовъ, и надѣя въ пану Богу, же воспокоиться тамъ усе, а потомъ на весну зо всею потугою на Москву и на козаковъ, душмановъ нашихъ. Пошовъ зъ нимъ панъ маршалокъ, панъ Чернецкій, а его милость панъ воевода Кіевскій, гетманъ великій, тутъ по(дъ) Зборовомъ станеть обозомъ съ килка-надцатьми тысячми. За чимъ тое доношу до вѣдомости вмс., моего мсци-пана; о чомъ ѣдеть панъ Шумовскій до хана его милости, зъ зупоминками короля его милости. Зычу тежъ того, абы вмс., мой мсцы-панъ, ханови его милости наменилъ, любъ Сеферкази-адзѣ его мл., абы послалъ до его мл. пана гетьмана, жебы послалъ килька тысячей на Вкраину конечне, а такъ певне мене пошле, давши съ тысячу другуніи, и такъ не будемъ порожневать, а не много речій намъ ся тое придеть. Прошу, нехай о томъ, що пишу, не много знають, а меновите наши, бо я то зъ доброе пріязни пишу. Безъ омешканья того бы посла треба выправить. О Сокольского вмс. мой мсци-пане, не фрасуйся: ховаеть ся ми здрайца, але о окупъ мусить быть вмс., мой мсци пану, которого се ласцѣ пильне залецаю.
Вмс., мой пане, и братъ и слуга Себастіянъ Маховскій, полковникъ короля его милости.
Письмо озаглавлено такъ: Списокъ съ листа, [37]каковъ листъ писалъ короля Польского Яна Казимера полковникъ Сабестянъ Моховской къ Крымскому Камамбетъ-мурзѣ.