3.—Около 1360. Грамота Митрополита Алексія на Червленый Яръ, боярамъ, баскакамъ, духовенству и мірянамъ, о подсудимости ихъ Рязанскому Епископу.
Благословеніе Алексѣя Митрополита всея Руси, ко всѣмъ крестіаномъ, обрѣтающимся въ передѣлѣ Черленого Яру и по карауломъ возлѣ Хопоръ, до Дону, попомъ и діякономъ, и къ баскакомъ, и къ сотникомъ[1], и къ бояромъ. Молюся Богови и Святой Богородици, да будете душею и тѣломъ вси добри, здорови, да исполнивали бы есте заповѣди Божіи; глаголеть бо Христосъ: «имѣя заповѣди моя и съблюдеть я, и той есть любяй мя.» Да возлюблени будете отъ Христа, исполнивайте заповѣди его. Имѣйте вѣру праву къ святѣй и единосущнѣй Троици, въ нюже крестистеся, любовь и миръ другъ къ другу, правду, цѣломудріе, милостыню, исповѣданіе грѣховъ своихъ; ибо Господь Богъ Іисусъ Христосъ тако реклъ своимъ ученикомъ и Апостоломъ: «шедше въ весь міръ, проповѣдуйте Еуангеліе всей твари; иже вѣру иметь и крестится, спасенъ будетъ, а не вѣруяй осудится.» И паки ту же благодать далъ имь и власть: «елико аще свяжете на земли (грѣхъ ради человѣчьскихъ), связани будутъ на небесѣхъ; елико аще разрѣшите на земли, будуть разрѣшени на небесѣхъ.» И паки тако глаголеть: «слушая васъ, мене слушаетъ, а отмѣтаяся васъ, мене ся отметаеть.» Ту же благодать пресвятаго Духа пріялъ и язъ грѣшны отъ пресвященнаго Патріарха Вселенскаго и отъ святаго Сбора, и приѣхалъ есми къ Святой Софіи, въ митрополью всея Руси, въ Кіевъ, и ко всѣмъ христіяномъ, обрѣтающимся во всей Руской земли, пастухъ и учитель; имѣю великую тягость на себѣ, что ми молвити и учити всѣхъ на вся душеполезная и спасеная. И того ради многажды и Ѳеогностъ Митрополитъ писалъ къ вамъ къ дѣтемъ своимъ, елико есть на пользу душамъ вашимъ. Вы же, какъ то и веремя являеть, что моихъ словъ и моего поученія не слушаете, но исполниваете волю тѣлесную и дѣла темныя; а слова моего не слушаете. Не вѣдаете ли, что всеѣ Русскіе земли Владыки подъ моею властію сутъ и въ моей воли? И язъ ихъ ставляю отъ благодати пресвятаго Духа. Такоже подана власть и Владыцѣ вашему. Вы пакъ какъ его слово не пріимаете; но странныхь пастуховъ пріимаете; и какъ то видится, нѣсте отъ паствы истиннаго пастуха Христа* но противнаго духа: ибо овца словесныя Христовы гласа Христова слушаютъ и послѣдуютъ слова нашего. Мы бо Христовы есмы и Христова слова глаголемъ: кій же есть Христовъ, слушаеть насъ и сотворяеть елико пишу; кій же не слушаеть насъ, не есть Божій: ибо истинный христіянинъ и вѣрный отъ дѣлъ своихъ является, якоже и Апостолъ глаголеть: «вѣра безъ дѣлъ мертва есть, такоже и дѣла безъ вѣры.» Того ради, дѣти, сътворяйте дѣла свѣтла; всяка бо злоба и горесть и ярость и гнѣвъ, блудъ и прелюбодѣйства, обида и зависть, убійство и пьянство да отъимется отъ васъ, зане Апостолъ глаголеть: «братья, не прельщайтеся, ни блудници, ни прелюбодѣйци, ни идолослужители, ни творяще блудъ рукою, ни мужоложници, ни лихоимци, ни татеве, ни грабители царства Божія не наслѣдять.» Сіи слышаще, възлюбленіи, отъ Святыхъ всегда, покайтеся и обратитеся къ Богу, поучитеся благая сътваряти и стерезите себе; поминайте смерть и воскресеніе, и суда оного страшнаго и Судію оного великаго и страшнаго, свѣдый сердца человѣчьская и помышленія и дѣянія, а праведнымъ вѣчный покой, а грѣшникомъ вѣчную муку. Вся та аще имете поминати, николи не согрѣшите, ни ослушиватися имете насъ, иже постави Духъ Святый пастуховъ и учителевъ ко всѣмъ крестіяномъ. Къ церквамъ всегда прибѣгайте, съ женами и съ дѣтми, и что имѣете въ рукахъ, приносите къ церквамъ и кь святымъ; а священниковъ и мниховъ любите и просите молитвы ихъ; вдовиць, и сиротъ, и полоняниковъ, и странныхъ милуйте и призирайте; иже въ темницахъ посѣтите, да сподобитеся блаженаго оного святаго гласа истиннаго Христа, глаголюща: «придѣте благословеніи Отца моего, и наслѣдуйте уготованное вамъ царство отъ сложенія міра: алченъ бѣхъ, накормисте мя, и жажденъ, напоисте мя, страненъ бѣхъ, и введосте мя, боленъ и въ темници, посѣтисте мя;» а злая створше и беззаконная, и немилостивіи, и нежалостивіи, поити имъ во тму кромѣшнюю. Иже имете исполнивати се, спасени будете, и нетяжко се есть. — О томъ же передѣлѣ, по Великую Ворону, возлѣ Хопорь, до Дону по карауломъ, церкви, что тотъ передѣлъ, какъ то пишуть грамоты брата моего Максима Митрополита и Петра и Ѳеогноста, что Сборомъ створили на Костромѣ, и Владыка Софоній далъ грамоты изъ устъ своихъ, что ему отъ тѣхъ мѣстъ, по тѣмъ грамотамъ, нелзѣ вступатися въ тотъ передѣлъ чюжій, и явлено есть и вси вѣдаютъ, что тотъ передѣлъ не Сарайскій. Нынѣ же пакъ Владыка Аѳанасій Сарайскій увѣдалъ то, видѣвъ грамотъ тѣхъ, и за вину его покажненъ отъ Митрополита писаніемъ, отступился того передѣла; и отъ сихъ мѣстъ Владыцѣ Аеонасью Сарайскому нѣтъ власти въ томъ передѣлѣ, но власть Резанская, попы и діяконы поставляющаго Владыкы и власть дающаго. И нынѣ послалъ есмь къ вамъ Владыку Рязанского Василья съ грамотою своею: и вы поминайте его, а пошьлину церковную давайте ему по обычаю. Аже исполните, какъ то пишю къ вамъ, душеполезная и спасеная, а грамоты послушаете, да и пошьлину церковную дадите; и милость Божія и Святой Богородици, и мое благословеніе да будеть съ вами, и съ женами вашими и съ дѣтми и со всѣми христіяны.
Изъ рукописи подъ заглавіемъ: Посланія Россійскихъ Митрополитовъ и другихъ лицъ (in 4°, XVI вѣка, грам. 94, л. 225 об.—226), хранящейся въ Московской Синодальной библіотекѣ подъ № 562.
Примѣчанія[править]
- ↑ Въ подлин. слово сіе приписано на полѣ.
