Акты исторические/ДО/Том 1/4

Материал из Викитеки — свободной библиотеки
Перейти к навигации Перейти к поиску
Yat-round-icon1.jpg

Акты историческіе : собранные и изданные Археографическою Комиссіею — Томъ 1.
I. Періодъ удѣловъ

авторъ неизвѣстенъ
См. Оглавленіе. Источникъ: Commons-logo.svg Акты историческіе. Томъ 1. — Санктпетербургъ: Типографія Экспедиціи заготовленія Государственныхъ бумагъ, 1841. Акты исторические/ДО/Том 1/4 въ новой орѳографіи



[5]

4.—1382. Посланіе Константинопольскаго Патріарха Нила Псковичамъ, о стригольникахъ.

Благородніи и честніи бояре, мужіе Псковичи, сынъ мой посадникъ, и сочскіи, и всѣ дѣти мои и прочіи христоименитіи людіе, подлежащіе святѣй митрополіи всея Руси, въ Рускомъ градѣ Пьсковѣ и въ предѣлѣхъ его обрѣтающіися, чада о Господѣ възлюбленная нашего смиреніа! Нарицаю убо вы вся сыны и чада, еще же и оны, иже отлучишася нѣціи отъ соборныя церкви и христьянскаго общеніа отступиша, дѣйствомъ лукаваго бѣса. Увѣдѣвше убо наше смиреніе и еже о насъ велиціи святіи Святителіе, божественый Сборъ, како нѣцій отъ васъ, извѣтомъ благочестія, еже мнѣтися хранити божественая Писаніа и священныхъ канонъ извѣстіе, отлучишась соборныя апостольскія церкви, вся еретики мняще, святителя и священникы и вся клирики и прочая люди христьяны, яко се поставляющія и поставляемыа, себе же токмо правовѣрныхъ мняще. Сіе же убо мы слышавьше, опечалихомся зѣло сердцемъ и внутрьнѣми поболѣхомъ о отсѣченіи Христовыхъ удъ, каковыя убо болѣзни и печали не хощемъ имѣти, слышаще наша уды отсѣкающася отъ врага истины, изначала человѣкоубійца, борителя нашего естества. Таковъ бо ему нравъ есть всегда: егда убо не възможетъ явѣ братися, неявленно съвѣщеваетъ мнящнмъ отъ десныя. Тако бо въведе всяку ересь въ церковь Христову. Понеже убо по плотнемъ пришествіи его Христовѣ, всяко идолослуженіе безъ вѣсти бысть, и сице не имяше мѣста діаволъ прочее покорити человѣкы идолослуженію, съ десныя подвижеся братися; ибо явѣ не възможе прелстити[1] да многымъ покланяются богомъ, сотвори Сына Божіа тварь именовати. Тако и прочая ереси въведе извѣтомъ, отъдесна[2], обрѣтая многобожіа. И убо днесь видимъ и въ васъ бывающая, да ся помалу отставятъ и отъ христьанства и церковнаго священія, яже Святители и священици подаютъ людемъ, еже безъ сихъ немощно коегождо спасеніа имѣти надежа, аще паче и ангелъ на земли живетъ и лжую сію похвалу всѣетъ въ насъ, и сътворитъ вѣровати, яко же убо по мьздѣ церкви Божіа поставленіе творитъ. И который лукавый демонъ толико ихъ прелсти, яко таковую вещь пріяти? Ибо церкви Божія Христова соборная апостольская, отъ конець земля до конець пребывающая, благодатію и силою самого Христа Бога нашего въ правовѣріи ненодвижимо въдружена крѣпцѣ; и таковыхъ въ священныхъ канонѣхъ извѣстно пребываніе и строеніе поставляющихъ на мьздѣ, яко продающая непродаемую благодать всесвятаго Духа, съ Симономъ и съ Македоніемъ и съ прочими съ духоборци съчитаетъ. Всяко убо Христова церкви тако мудрьствуетъ повсегда. Понеже убо нѣціи суть сіе нечестіе дѣйствующе и дерзающе по мъздѣ поставляти, нѣсть убо се, нѣсть соборныя церкви. Суть бо нѣціи тайно любы дѣющаа, на безвѣстная съдѣловающая: но егда обличатся, мучатся, яко отъ церкви осужаеми бываютъ и измещеми. И аще убо нѣціи Епископи суть по мьздѣ поставленіа сотворяюще: но не подобаетъ сего ради отсѣщися отъ церкви и мнѣти вся еретики, но совъкупленымъ[3] быти и церкви причастникомъ, възвѣстити же злѣ творящаго Епископа своему Митрополиту; аще же онъ не сътворитъ исправленія, да казнится [6]отъ нашего смиренія, егоже устави Богъ отца и учителя, Патріарха всея вселеныя Царяграда. Сего ради пишемъ и извѣствуемъ вамъ отецьски, яко своимъ чадомъ, яко церкви участію, яко самого того уди Христа, главы всея церкви: престаните отъ раздоровъ и разлученій, и совъкуплшесь, единоумъствующе, прочему церковъному чину съгласно славу да всылаете. Ибо церкви Христова въ правовѣріи славится и въ истовѣ житіи; а еже на мздѣ поставленіе, нечестіе нарицаетъ явно. Поставляемыя же многажды о собѣ сами исторы сътваряютъ, на свѣщи, на вино и прочіа пошлины[4], и на тряпезу; таковая же не врежается симъ, ибо поставленіе туне бываетъ, якоже рече Христосъ: «туне приясте, туне же и дадите.» Ино бо еже взимати мзды поставленія дѣля, ино же о нужныхъ потребахъ исторы. И обрѣтаемъ Господа Бога нашего Іисуса Христа, ходящу ему въ многыя домы со ученикы своими и достойная въсприятія его, иже учаще истинному слову и богоразумію, и чудеса многа сотворяюще, пріимающе яже отъ нихъ бываемая; и сія множицею. «Егда бо вниде, рече, въ домъ Матѳея мытаря, и створи ему учрежденіе велико.» И: «въ домъ вшедшу ему Маріи и Марѳы, Марѳа же тщашеся о мнозѣ службѣ,» и другаа етера[5] многа таковая обрящеши. Божественый же Апостолъ Павелъ, отъ Моисеова закона приводя: «не завяжеши рта волу верхущу,» таже разумъ божественаго Писанія толкуя, «егда о волѣхъ, рече, радитъ Богъ, но насъ дѣля вся глаголеть». Такоже: «священаа содѣвающе отъ церкви ядятъ; олтарю служащіи съ олтаремъ съдѣляются». Тако и Господь повелѣ еже Еуангеліе благовѣствующимъ отъ Еуангеліа жити. «Аще мы вамъ всѣяхомъ духовная, веліе ли, аще тѣлесная ваша пожнемъ?» Многа же сицевая хотяй обрѣсти, имать въ божественномъ Писаніи, яже съ разумомъ правымъ бываемая и благою совѣстію, ничтоже споны творитъ еже туне безо мьзды стваряемое поставленіе. Яже вся разумѣвающе, потъщитеся исправити злѣ бывшая. Сего бо ради посла наше смиреніе и великый Съборъ боголюбиваго Архиепископа Суждальскаго Діонисія, мужа честна и благочестива и добродѣтельна, и священныхъ каноновъ извѣстна хранителя, да видитъ вы отъ насъ и благословить, и поучитъ и накажетъ, и извѣщаетъ и подобная устроитъ, и совокупитъ съборнѣй апостольской Божіи церкви, да увѣсте, яко отлучаяся отъ церкви, самого того Христа Бога отлучается: нѣсть имъ участія ни жребія, ни въ семъ вѣцѣ ни въ будущемъ. Коей бо церкви прилѣзите? Ни убо Латыньская церкви, иная въмѣшше паче апостолскыя и отечьскыя вѣры

 . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
[6]

по мьздѣ ставленіе, тамо и сія бываетъ: поистиннѣ, отпродаетъ церкви Папа. Аще убо отлагаетеся отъ церькви своея, виною мьзды поставленія и отсѣкаетеся яко еретики; то уже Христосъ днесь на земли церкви не иматъ, по вашему слову, и ложь есть слово оно еже рече: «яко съ вами есмь до скончанія вѣка.» Но нѣсть сице, не буди то. Буди же вамъ, познавше спасенія путь и совокупльшеся съ братьею своею, въ единомъ съчетаніи славити Бога, егоже благодать и милость со всѣми вами буди. Сія же написахомъ отъ многа вмалѣ, болшее же извѣстихомъ на Архиепископѣ Діонисіи: елико изъ устъ речеть вамъ, пріимите яко наше слово. И хощемъ, да пишете къ намъ, [7]да удѣмы исправленіе бывшее благодатію Божіею, и прославимъ Бога и възвеселимся о възвращеніи тѣхъ и о покаяніи, о немъ-же радуются Ангели и человѣци, по Господа нашего Іисуса Христа глаголу, егоже буди всѣмъ намъ получити милость и человѣколюбіе, въ семъ вѣцѣ и въ будущемъ, ему же слава съ Отцемъ и съ Святымъ Духомъ, нынѣ и присно и въ вѣкы вѣкомъ, Аминь.

Изъ рукописи подъ заглавіемъ: Посланія Россійскихъ Митрополитовъ и другихъ лицъ (in 4°, XVI вѣка, грам. 114, л. 326 об.—330), хранящейся въ Московской Синодальной библіотекѣ подъ № 562. Въ заглавіи акта отмѣчено: «посланіе Патріарха Царяграда, о проторѣхъ на поставленіахъ.»

Примѣчанія.

  1. Въ подлин. слово «прелстите» приписано вверху строки.
  2. Прибавлено на полѣ.
  3. Въ подлин. неправильно «совъкупленіемъ.»
  4. Эти три слова приписаны на полѣ, тоюже рукою.
  5. Слово «другаа» выставлено иа полѣ, кажется, для обьясненія слѣдующаго за нимъ Греческаго слова (έτέρα), которое оставлено было безъ перевода.
  6. Въ подлин. это мѣсто испорчено переписчикомъ такъ, что нельзя возстановить смысла; оно читается: «вѣры. якоже въ иныя, впасти. тмами ересій. и тако и си яже по мьздѣ» и т. д.


PD-icon.svg Это произведение перешло в общественное достояние в России и странах, где срок охраны авторского права действует 70 лет, или менее, согласно ст. 1281 ГК РФ.

Если произведение является переводом, или иным производным произведением, или создано в соавторстве, то срок действия исключительного авторского права истёк для всех авторов оригинала и перевода.