9.—1395 Мая 12. Грамота Митрополита Кипріана Псковичамъ, о несужденіи поповъ безъ святительскаго суда и неприсвоеніи селъ и земелъ церковныхъ.
Се язъ Кипріянъ Митрополитъ Кіевьскій и всея Руси. Что есмь слышалъ, ажь въ Пьсковѣ міряне судятъ поповъ и казнятъ ихъ въ церковьныхъ вещѣхъ , ино то есть кромѣ хрестьяньскаго закона: негодится міряномъ попа ни судити ни казнити, ни осудити его, ни слова на него не молвити: но кто ихъ ставитъ Святитель, но тъ[1] ихъ и судить и казнить и учить. А вы бы есте, дѣти мои, Псковичи, отъ велика и до мала, чтобы есте не судили поповъ, ни казнили ихъ, грѣха бы есте на свою душю не имали, ни зарока бы есте на всь Псковь не чинили. Слышалъ есмь и то, что попы нѣкоторыи молодыи да овдовѣли, а ни поповьство оставили да поженилися; и того вамъ такъже негодится судить, чтобы есте ихъ не заимали ничимъ: вѣдаеть то Святитель, кто ихъ ставить, тотъ и поставить и извержеть, и судить и казнить и учить; а вамъ негодится въ та дѣла въступатися. А кого церковь Божья и Святитель огласитъ, и вамъ по тому оглашенію годится такъ же держати его. А что земли церковныи лии села, купили ли будуть, или кто будеть далъ, умирая, которой церкви; а въ тѣ бы есте земли не вступалися никто отъ васъ, чтобы церковь Божья не изобижена была, занеже въ томъ великъ грѣхъ отъ Бога. Сего ради и азъ, по сану и по области, юже ми далъ Богъ, учю васъ своихъ дѣтей, а вы моего слова слушайте; а кто сея грамоты не послушаетъ, не буди Божья милости на немъ, ни моего бдагословленья; или кто послушаеть, а милостъ Божья на васъ. А дана грамота въ Великомъ Новѣгородѣ, мѣсяца Маія въ 12 день, индикта 5, въ лѣто 6903.
Изъ рукописи подъ заглавіемъ: Іосифа Волоколамскаго о Новгородскихъ еретикахъ, и Посланія Митрополитовъ Кипріана и Фотія во Псковъ (in fol., XVI вѣка, грам. 11, л. 445—446), хранящейся Румянцовскомъ Музеумѣ, подь № 204.
Примѣчанія[править]
- ↑ «Но тъ» должно читать: «ино тотъ.»
