Домострой. По рукописям Императорской Публичной Библиотеки (Яковлев 1867)/I/20/ДО

Материал из Викитеки — свободной библиотеки

[53]
ГЛАВА К[1].
КАКЪ ДѢТЯМЪ ОТЦА И МАТЕРЬ БЕРЕЧИ И ПОВИНОВАТИСЯ[2] ИМЪ ВО ВСЕМЪ.

Чада послушаите заповѣди Господня: любити отца своего и матерь свою, и послушаите ихъ, и повинуитеся имъ, по Бозѣ во всемъ; и старость ихъ чтите и немощь ихъ, и скорбь всякую отъ всея душа, понесите на своеи выи: и и благо вамъ будетъ, и долголѣтни будите на земли; симъ очистите грѣхи своя, и отъ Бога помиловани будете, и отъ человѣкъ прославитеся, и домъ вашъ будетъ вовѣки, и наслѣдятъ сыны сыновъ твоихъ[3], и достигните старости маститы, во всякомъ благоденствѣ дни своя[4] препровождающе[5]. [54]Аще кто злословитъ, или оскорбляетъ родителя свои, или клянетъ и лаетъ, сеи предъ Богомъ грѣшенъ есть, а отъ народа и отъ родитель проклятъ. Аще кто бьетъ отца или матерь отъ церкви Божіи и отъ всякія святыни да отлучатся, и лютою смертію и градскою казнію да умретъ; писано бо есть: отча клятва сына потребитъ, а матерня и искоренитъ. Сынъ или дщерь непослушивы отцу и матери, въ пагубу себѣ[6] будутъ и не поживутъ днеи своихъ; еже прогнѣваетъ отца и досажаетъ матери, мнится не согрѣшая къ Богу, и есть поганыхъ горѣе и обѣщникъ[7] нечестивымъ, о нихже пророкъ Исаия рече: да возмется нечестивыи, да не видитъ славы Господня[8]; нечестивыхъ именова иже безчествуютъ родителеи своихъ. И паки рече: насмѣхающагося отцу, и укоряющаго старость матерню, да склюятъ и вранове, да снѣдятъ и орли; честь же творя отцу и матери и повинуешися имъ, по Бозѣ, во всемъ возвеселится имутъ о чадехъ своихъ и въ день печали ихъ избавитъ ихъ Господь Богъ, и молитву ихъ услышитъ и, его же просятъ, подастъ имъ вся благая; покояи матерь свою, волю Божію творитъ, угождая отцу, во благихъ поживетъ; вы же чада дѣломъ и словомъ угождаите родителемъ своимъ во всякомъ блазѣ совѣтѣ; да благословеніе будетъ отъ нихъ; отче благословеніе домъ утвердитъ, а матерня молитва отъ напасти избавитъ. Аще оскудѣютъ разумомъ въ старости отецъ и мати, не безчествуете ихъ, ни ударяите[9], да отъ [55]своихъ чадъ почтени будете. Не забываите труда матерня и отцова яже о васъ болѣзноваша и печални быша; покоите старость ихъ и о нихъ болѣзнуите якоже они о васъ. Не глаголи много имъ[10] сотворихомъ[11] добра одѣяніемъ и пищею и всякими потребами, но нѣси свободь[12] симъ: не можете бо ею родити, и тако ею болѣти, яко они о тебѣ. Тѣмъ же со страхомъ, раболѣпно служите имъ, да и сами мзду отъ Бога пріимете, и жизнь вѣчную наслѣдите, яко совершители заповѣди его.

Примѣчанія[править]

  1. Въ Р. Т. № 38 и Конш. глава ИІ.
  2. Р. Т. № 38 покорятися и послушати ихъ.
  3. Арх. Цар. Болш.=своихъ.
  4. Р. Т. № 38 провожающе.
  5. Конш.=препровожаютъ.
  6. Ibid.=имъ.
  7. =общникъ.
  8. Р. Т. № 38 сихъ.
  9. Р. Т. № 38 и Конш.=ни укоряите.
  10. Р. Т. № 38=има.
  11. Конш.=сотворихъ.
  12. Ibid.=ни си свободь симъ.


Это произведение перешло в общественное достояние в России согласно ст. 1281 ГК РФ, и в странах, где срок охраны авторского права действует на протяжении жизни автора плюс 70 лет или менее.

Если произведение является переводом, или иным производным произведением, или создано в соавторстве, то срок действия исключительного авторского права истёк для всех авторов оригинала и перевода.