А толко у мужа въ году припасется[3] ржи, и пшеницы, и ячмени, и овса, и гречи, и толокна, солоду, и гороху, и конопли, и всякія запасы,—и въ постъ во всякія ѣствы, поремѣняя по вся дни дѣлаютъ сами жена и слуги; и семья сыта и прохладна, и гостя употчиваютъ безъ убытка; которые будуть ѣствы постныя похочетъ, то и сдѣлаютъ. Масло конопляное дома[4]: и заспа всякая, и мука, и пироги, и блины, и соцни[5], и трубцы дѣлаютъ и всякіе каши, и лапши гороховое, и цѣженои[6] горохъ, и зобанецъ, и кулдумцы[7], и варенои, и соковые ѣствы: пироги съ блинцы, и съ рыжики, и съ груздми, и съ макомъ, и съ кашею, и съ рѣпою, и съ капустою, и съ орѣшки въ соку, и короваицы съ чѣмъ Богъ послалъ. А у добраго человѣка и у порядливои жены толко запасено[8] въ пору. Коли рыбу свѣжую купячи, иную солить, иную вялить, иную подпаривать[9], иную сушить мелкую, иную въ муку толчетъ, въ постъ во щи присыпаютъ, коли пригоже; или бочку и двѣ купить рыбки просолные имѣхъ (?) сущу, ино въ постные дни про гость и про себя. Коли свѣжеи рыбѣ не быти, и въ постъ великіи преже[10]: ретка, хрѣнъ, капуста, расолъ и иные земные[11] плоды, что Богъ послалъ. А въ иные, по гостямъ смотря, икра, и вялая[12] рыба, и прутовая, и подпариваная, и ухи пластовые, и шипаные, подпариваные, и всякіе потрохи[13] и въ пирозѣхъ, и въ кашѣ, и ягль,—и всякои снѣтъ[14], и всякіе пироги, и каши, и кисель, и блины и всякихъ ѣствъ[15] у доброи порядни и постныхъ много, а все Богъ послалъ дома, въ торгу ничего не купишъ[16], а и не будетъ въ запасѣ чего, ино купити въ пору, ино у рубля алтынъ пяти, шти не додастъ, а не въ пору, гостя для и себя, что понадобится купити и ты иногда того и въ торгу не добудешъ, а и добудешъ не въ пору и ты купишъ въ три цѣны, а не милои кусъъ[17]. А у добраго человѣка, и у порядливои жены, и у добрыя и у смышленныхъ и у разумныхъ[18] людеи и у годоваго запасу, и у рухляди, и у ѣствъ, и у питія, и у хлѣбнаго, и у воложнаго, и у мяснаго[19], у рыбнаго, и у ветчиннаго, и у салонины, и у вялаго, у вѣтряняго, и у просолу, и сухари, мука, и толокно и инои запасъ: макъ, пшено, горохъ, масло, конопли, соль, дрова, солодъ, хмѣль, медъ, мыло, и сало[20], и всякои запасъ, чему мочно впредь быти[21] и не изгноено. А всякого бы году во всякомъ обиходѣ, и въ запасѣ сходилося, въ инои годъ и чего не родилося или дорого, ино тѣмъ запасомъ, какъ припасено даромъ проживетъ, а нужнаго, и болнаго, и недостаточнаго ссудитъ, подможетъ, кому какъ пригоже. Какъ чего изобилно припасено въ дешевую пору[22], ино въ дороговлю и продасть; ино самъ ѣлъ, и пилъ, и носилъ даромъ, а денги опять дома. Добраго человѣка и добрыя жены, ни какъ[23] ни въ чемъ меженина не иметъ. А старые запасы держати на многіе лѣта, кои не портятся.
Примѣчанія
[править]- ↑ Р. Т. № 38 и Конш. глава МГ № 1 МЗ.
- ↑ Арх. и мяснаго.
- ↑ Конш.=все припасено.
- ↑ Ibid. все дома.
- ↑ Цар. Пог. Арх.=сочни.
- ↑ Р. Т. № 1 и 38 и Конш.=цыженои.
- ↑ Конш.=кундумцы.
- ↑ Р. Т. № 1. Цар. Арх. и Пог.=запасецъ.
- ↑ Конш.=подвариваетъ.
- ↑ Конш. въ столѣ.
- ↑ Ibid.=земляныя.
- ↑ Арх.=вяленая.
- ↑ Р. Т. № 1, 38 и Конш. и хохолковые, и изъ вандышевъ, и немѣцкихъ сельдеи, и въ росолѣ.
- ↑ Арх. снѣдъ. Цар. снѣтокъ.
- ↑ Р. Т. № 38=ѣствовъ.
- ↑ Р. Т. № 1, 38 и Конш., далѣе слѣдуетъ: А брусничная вода, и вишни въ патокѣ, и малиновои морсъ, и всякіе сласти; и яблока, и груши въ квасу и въ патокѣ; и пастилы левашники себѣ и прогость и за немощь, всегда есть, толко въ пору припасено. А нужному, и болному и родительницѣ (родильницѣ Цар.), и заѣзжему человѣку дастъ; ино велія мзда отъ Бога. А которыхъ рыбъ нѣтъ въ запасѣ, или запасъ придержался и бочка самому не изойдетъ купити, и прибавь (Арх, Цар.=прибравъ къ себѣ) товарища или два бочку осетрины, или бѣлужины, или селдеи, или какои ни буди рыбы, или осетрины купити вмѣстѣ, или икру свѣжую;—у рубля пяти алтынъ не додашъ.
- ↑ Ibid. оканчивается глава, продолженіе въ слѣдущей главѣ подъ заглавіемъ: о запасной прибыли въ передъ.
- ↑ Р. Т. № 38 и Конш. у благоразумныхъ и богобоязливыхъ.
- ↑ Ibid. и у полтеваго.
- ↑ Р. Т. № 1, 38 и Конш.=зола.
- ↑ Ibid. въ береженьи.
- ↑ Р. Т. № 1=въ весну въ торговлю. Цар. вешнюю.
- ↑ Конш.=коли.