1. Стрельцов во всяких делех, опричь разбою и татьбы с поличным, судити и управа меж ими чинити в Стрелецком приказе. А почему у стрельцов с их исков по судным делам пошлин имати, и то писано выше сего.
2. А будет которому стрельцу чего искати на стороннем человеке в ином приказе: и ему того своего иску на стороннем человеке искати в ином приказе, по подписным челобитным из Стрелецкого приказу, а без подписных челобитен стрельцом ни в котором приказе ни на кого, ни в чем, суда не давати. А будет кто учнет на стрельце искати встрешно: и на него суд давати в том же приказе.
3. А будет учнет стрелец на стрельце же искати своего и жены своей бесчестья, и доищется: и на виноватом за стрелецкое и жены его бесчестья, по судному делу, правити деньги. А будет которой стрелец учнет бити челом Государю, что ему того бесчестья платити нечем, и за то бы бесчестье учинити ему наказание: и по тому его челобитью велети ему за то бесчестье учинить наказание, бити его кнутом, чтоб ему и иным таким не повадно было свою братью стрельцов и их жен бесчестить.