Домострой. По рукописям Императорской Публичной Библиотеки (Яковлев 1867)/I/24/ДО

Домострой.
 : По рукописямъ Императорской Публичной Библіотеки
Подъ редакціею В. Яковлева

См. Оглавленіе. Источникъ: Домострой. По рукописямъ Императорской Публичной Библіотеки / В. Яковлевъ. — Санктпетербургъ: Изданіе Д. Е. Кожанчикова, 1867

 

ГЛАВА КД^[1]. КАКОВЫ ЛЮДИ ДЕРЖАТИ И КАКО О НИХЪ ПРОМЫШЛЯТИ, ВО ВСЯКОМЪ УЧЕНІИ ВЪ БОЖЕСТВЕННЫХЪ ЗАПОВѢДЕХЪ И ДОМОВНЕМЪ СТРОЕНІИ.

Людеи у себя держати дворовыхъ добрыхъ, чтобы были рукодѣльны и кто чего достоинъ и какому рукодѣлію^[2]. Не воръ бы былъ, ни бражникъ, ни зернщикъ, ни тать, ни разбойникъ, ни блудникъ^[3], ни всякому зло творящъ. Всякои бы человѣкъ у добраго государя первое наученъ страху Божію; потомъ^[4] всякои добродѣтели^[5], и вѣжству, и смиренію, и доброму промыслу, и домовному строенію; ни кралъ бы, ни лгалъ^[6], а всякои добродѣтели прилеженъ былъ со смиреніемъ и съ наказаніемъ государя своего, по апостола Павла заповѣди, еже пишетъ къ Тимофею: «елицы суть подъ игомъ работы^[7] своя господы всякой чести^[8] достиины, да творятъ; да имя Божіе и ученіе не хулится; имущихъ вѣры господы да нерадятъ, яко братія суть, но паче работаютъ, яко вѣрни суть и возлюблени, иже заступающе и благодать воспріемлюще. Сія господине, самъ ты учи и моли рабъ своихъ таковымъ быти имъ, съ запрещеніемъ и съ грозою многою». И паки тои же апостолъ къ Титу пишетъ^[9]; повелѣваетъ рабомъ предъ своими господы^[10], повиноватися и во всемъ благоугоднымъ быти: не прикословити^[11], ни крадуще^[12], но вѣру всяку являюще благу да ученія Спасителя нашего Бога украшаютъ о всемъ, и^[13] сытъ бы былъ твоимъ^[14] жалованіемъ и одѣнъ^[15] или своимъ рукодѣліемъ. А чѣмъ ты его пожалуешь^[16] платіемъ или конскимъ жалованіемъ^[17], и всякою животиною^[18], или пашнею^[19], или торговлею какою на его часть или самъ что примыслитъ^[20] своими труды, тѣмъ бы доволенъ былъ и блюлъ бы впредь. А лучшее платіе^[21], верхнее и нижнее, и рубашки, и сапоги, блюлъ бы по праздникомъ и при добрыхъ людяхъ и въ ведро, а всегда было бъ у него честно^[22], и не изгрязнено^[23], и не измочено^[24] и отъ всякія нечистоты соблюдено. Который у тебя человѣкъ^[25] о томъ не береженъ и твоимъ жалованіемъ^[26] о томъ нелѣпо ходитъ и беречи не умѣетъ, и ты бъ своему прикащику велѣлъ^[27] у такихъ не чювъственныхъ людей^[28] платіе съ нихъ снимати лучшее, и въ своеи казнѣ беречи, и на время имъ давати и потомъ снявъ, такожъ у себя беречи^[29]; а всемъ дворовымъ людемъ наказывати почасту, чтобы дѣлали въ ветчаномъ платіи или новое на страду ему дало; а какъ въ праздники или при добрыхъ людехъ у тебя случается, или тебѣ самому въ людѣхъ быти, было бы на людехъ на твоихъ платіе доброе и берегли бы отъ грязи, и отъ дождя, и отъ всякія нечистоты и, по времени снявъ съ себя платіеце высушити, и вымяти^[30], и укласти хорошенько гдѣ живетъ^[31]; ино себѣ любо^[32], и отъ людей тебѣ честно^[33], и слугамъ твоимъ прочно, таковое береженіе къ платію и всегда въ новѣ ходитъ. А люди бы были у тебя во чти, и въ грозѣ, и во всякомъ дозорѣ. И промѣжду бы собою не кралися, а чюждаго отнюдь не похотѣли ни которыми дѣлы, а твоего^[34] бы берегли всѣ за одинъ; а тебѣ^[35] бы не лгали, и не клеветали ни на кого, ни въ чемъ; а ты^[36] бы имъ въ томъ^[37] не потакалъ и обыскивалъ съ очеи на очи; злому^[38] не отпущай^[39] но съ милостію казнь даи, да и прочіе страхъ пріумутъ на злое не держати, а добраго жалуи, и всякъ добру ревнуетъ и твоимъ жалованіемъ хощетъ выслужити правдою и прямою свою службою; и твоимъ наказаніемъ и наукамъ вѣкъ свои изжеветъ въ добрѣ и безъ^[40] твоеи опалы, и душу спасетъ, и государю услужитъ, и Богу угодитъ; да и наипаче тебѣ самому^[41] наказывати людей своихъ, которымъ вмѣстно ходити къ церкви Божія всегда, или по праздникомъ; или во дворѣ слушати пѣнія^[42]; и, особь на единѣ молитися, и чистота тѣлесная хранити, отъ всякаго неподобнаго дѣла отъ блуда, и піянства, и лукавства^[43], и отъ безвременнаго питія и ядѣнія и отъ объяденія, и піянства воздержатися и отцевъ бы духовныхъ съ женами своими имѣли, и на покаяніе приходили^[44]. А холостыя отроки и дѣвки въ совершеннемъ возрастѣ женить; по апостолу^[45]: честенъ бракъ и ложе не скверно, а прелюбодѣемъ судитъ Богъ; а которыя холосты и блудъ творятъ твоимъ небреженіемъ, или таи отъ тебя: и тебѣ того такожъ пытати со многимъ испытаніемъ, а отнюдь бы неименовалося у тебя таковое дѣло; аще не радиши, а слугъ держиши, а попеченіе о душахъ ихъ не имѣеши, токмо еже дѣло имъ дѣлати рано и поздно на твою потребу, на пищу, и одѣяніе, и на всякую твою службу: и тебѣ самому о душахъ ихъ отвѣщати въ день Владычня суда, по апостолу еже пишетъ^[46] въ посланіи своемъ: «не брашна ради и питія разоряй дѣло Божіе^[47]»; еже презирати плотскія попещи же ся о душѣ, вещи безсмертныя; по апостолу же: имуще пищу и одѣяніе сими довольни будите^[48]. А женатыя бы слуги со своими женами законно жили, по духовнаго отца наказанію, мужи отъ женъ своихъ не блудили, а жены отъ мужеи, и по твоему наказанію и отца духовнаго ученію, такожъ и они учили женъ своихъ^[49] страху Божію, и вѣжеству, и смиренію; а государыни бы слушали, и повиновались во всемъ; и своими труды выслуживали и рукодѣліемъ, а не крали бы, и не лгали, и не бражничали, и не блядили^[50], и бабъ бы неслушали, кои на зло потворяютъ молодыхъ женъ, сіи рѣчь^[51] сваживаютъ съ чюжими мужи, и наипаче ихъ учатъ красти и блясти и всему злу. И многихъ^[52] слышахъ отъ бабъ потворныхъ, иже^[53] бѣгаютъ покрадчи государя и государыню, со многимъ имѣнемъ: женки и дѣвки съ чужими мужики, и егда возмутъ у нея съ чѣмъ сбѣжала, и ея убіютъ или въ воду посадятъ, ино себя погубитъ, а имѣніе^[54] твое изгинетъ. Аще ти не вѣрно мнится о таковыхъ бабахъ, то и како въ домъ твои пріити мужику незнаему; но сею прелетію и и иною разною казнію бываетъ. Женка или дѣвка по воду, или платіе мыти и съ мужикомъ учнетъ говорити; аще и знаемъ будетъ имъ, но ни^[55], понеже срамятся съ нимъ и созрѣтися; данежъ съ чюжимъ мужикомъ, а не съ своимъ мужемъ говорити; а бабѣ, всегда еи время съ ними о каковѣ дѣлѣ говорити^[56] и учинится она торговкою, и пришедъ, пытаетъ у нихъ: надобно ли вамъ то, или иное, или государыне вашея? И онѣ у нея вспросятъ: есть ли то. Она же молвитъ—есть. И онѣ^[57] еи молвятъ: даи^[58] и мы покажемъ государынѣ; а она же отмолвится^[59], дала есмь тои и тои^[60] женѣ доброи тово и тово, и скажетъ человѣка добраго^[61] по имяни, а въ семъ^[62] солжетъ: и азъ, кунки, иду, да у неѣ возму и къ вамъ принесу; и они еи призапретятъ: принеси къ намъ до обѣда же, или какъ вечерню поютъ; баба жъ молвитъ: у кунки, знаю я, какъ къ вамъ пріити, то^[63] и вы государя блюдетеся. И отоидетъ отъ нихъ, и не идетъ къ нимъ день или два; по дни же, или другомъ дни ко двору къ нимъ неидетъ, стрежетъ ихъ, какъ поидутъ на рѣку по воду или платіе мыти; баба же поидетъ, будто^[64] мимо; они же ея восскличютъ, и молвятъ еи: о чемъ ты къ намъ не бывала еси, и не принесла еси, что хотѣла принести? Баба жъ къ нимъ удивится вельми и молвитъ: о кунки вчера и третіи день была ести у тоѣ и тоѣ добрые жены, и мужу имя скажетъ, а у нихъ былъ пиръ, и она кормилица меня не отпустила и ночевола есми у нея съ ея служками^[65], а тамо вами не поспѣла ходити,—меня жалуютъ многія жены добрыя. Они же къ неи молвятъ: прянеси же къ намъ и съ запрещеніемъ великимъ рекутъ еи… Да-не-плету много! Сими дѣлы бабы опознаваются съ женками и съ дѣвками служащими. И начнетъ съ ними та баба невозбранно стояти и говорити, на рѣкѣ и на встрѣчѣ. Аще и государь осмотритъ и молвитъ,—они же съ женою, а не съ мущиною стоятъ; и потомъ начнетъ къ нимъ и ко двору приходить; они жъ опознаютъ ее и съ государынею своею^[66].... и отъ таковыхъ бабъ младымъ людемъ велія спона бываетъ: прельщеніе на блудъ, и на татьбу, и дѣтемъ губленія, и изгибель всему имѣнію и всему дому смятеніе. Паче же глаголю^[67]: горе мнѣ, вси есмы прелщаемы отъ общаго врага діавола, нашимъ оружіемъ побѣждени бываемъ. Дерзну рещи: блаженная Ѳеодора Александрійская не отъ жены ли прельщена, ложе мужа своего не сохрани; но едва покаяніемъ и терпѣніемъ многимъ умоли всемилостиваго Бога, и велику сподобися отъ Бога сосуду избранну быти; а^[68] и намъ, еще же умолчимъ, понеже не вмѣстно бываетъ слышащимъ, а имѣяи уши слышати, да слышатъ и разумѣваетъ въ прикрытыхъ словесѣхъ. Но преди поидемъ о тѣхъ же слугахъ^[69]. И съ дурными бы рѣчми къ государыне не приходити; и волхвовъ, съ кореніемъ и съ зеліемъ, и кто тѣмъ промышляетъ, съ тѣми бы отнюдь не зналися, и государемъ бы своимъ про тѣхъ^[70] не сказывали: тѣ суть бѣсовскія слуги; а служили бы государемъ своимъ вѣрою, и правдою и добрыми дѣлы^[71]. А государь, и государыня, людеи своихъ^[72] жаловали бъ и поили, и кормили, и покоили, и одѣвали; и въ теплѣ бы жили, и во всякомъ покоѣ и во благодѣнствѣ всегда^[73]. И государь и государыня, аще пребудутъ въ семъ наказаніи, какъ писано, и онѣ душа своя спасутъ и домъ свои устроятъ, и слугъ своихъ такожъ и въ душевномъ и въ тѣлесномъ, безъ всякіе скорби; такожъ государю и государыне достоитъ попеченіе имѣти о^[74] нищихъ, и странныхъ, и убогихъ, вдовицъ и сиротъ^[75] достаитъ ихъ покоити^[76], паче жъ въ ихъ недостачествѣ^[77] во всякомъ въ душевномъ и въ тѣлесномъ, отъ своихъ праведныхъ трудовъ; въ душевномъ разумѣваи, а въ тѣлесномъ разсмотряи; такожъ и къ церквамъ Божіимъ, и къ церковнякомъ, и въ монастыри, и въ темницы приноси и посылая елико твоя сила^[78]. Аще не имѣеши что подати, и ты слово рцы утѣшно, аще ли и сего не достанетъ ти, и ты не озлоби и не опечали^[79], поминая свою нищету и помысли евангельское^[80] слово: емужъ много дано, множаишая просятъ отъ него, сіи рѣчь преизлишьшее; а ему же мало, малѣишая и просятъ отъ него, еже есть, чашу малу воды или слово утѣшно,—то есть малѣишая, то и послѣдни; такожъ и^[81] въ домъ свои призываи^[82],—и та Богу милостыня пріятна и душѣ полезна. А отнюдь бы не вмѣщалося въ домъ твои ни отъ насилія, ни отъ грабленія, ни отъ татьбы, ни отъ всякого мшелоимства^[83], ни отъ ябедничества, ни отъ криваго суда, ни отъ корчебнаго прикупа. Аще отъ сего зла соблюдешись^[84] то и домъ твои благословенъ будетъ отъ нынѣ и до вѣка^[85]. А государь и государыня и съ чады, и съ людми своими^[86], мужы и жены, старіи и младіи, по вся годы, въ великія посты ко отцемъ духовнымъ на покаяніе приходили, а достоиніи бы и причащалися Святыхъ божественныхъ даровъ; аще и не единыжды^[87] годомъ, то болѣ мзду пріимутъ отъ Бога; а отцы бы духовныя государя, и государыню и ихъ слугъ на се поучали, а государь бы о своеи души и о слугахъ своихъ о семъ великое попеченіе имѣлъ, а милостыню слугѣ за свою душу дати нечего, и за нихъ государю дати, и о всѣхъ ихъ потребныхъ опричѣ злаго дѣла. Во весь годъ^[88] въ среды, и въ пятки, и въ недѣли, и въ праздники господскія, и въ великіи^[89] постъ и въ Госпожинъ^[90] чистоту тѣлесную хранити, и во всякихъ бы добродѣтелехъ, и отъ піянства въ воздержаніи пребывати; и къ церквамъ Божіимъ приходили бы съ приношеніемъ: за здравіе и за упокои; и всякія святыни касалися, по достоинству и по совѣту отца духовнаго. А прочее писано о томъ же во главѣ.

 

Примѣчанія

1. Въ Р. Т. № 38 и Конш. глава КВ.
2. Конш. ученъ.
3. Р. Т. № 38 и Конш. не чародѣи, не корчмитъ, не оманщикъ.
4. Конш.=и вѣжьству и смирѣнію и.
5. Р. Т. № 38 и Конш.=и всякимъ добродѣтелемъ.
6. Р. Т. № 38 и Конш. не разбилъ, никого не обидѣлъ далѣе въ этой рукописи слѣдуетъ пропускъ.
7. Конш.=раби.
8. Ibid.=чти.
9. Ibid.=пиша.
10. Ibid.=своимъ господамъ.
11. Ibid.=не преко-глагольникомъ.
12. Ibid.=не крадущимъ.
13. Отсюда продолжается ркпс. Т. № 38.
14. Ibid.=и твоимъ государевымъ.
15. Цар.=да одѣяніемъ.
16. Конш.=государь его пожалуетъ.
17. Р. Т. № 38=лошадь.
18. Ibid.=и всякимъ нарядцемъ.
19. Конш.=пашенькою.
20. Ibid.=замыслитъ.
21. Р. Т. № 38=платенко.
22. Р. Т. № 38 и Конш.=чистенко и не извалено.
23. Конш. и не излито.
24. Р. Т. № 38 и Конш. и не измято.
25. Ibid. глупъ и грубъ и невѣжливъ (Конш. невѣжда) и небреженъ.
26. Ibid. или своими труды сдѣлано.
27. Р. Т. № 38 и Конш.=ино государю или приказано кому.
28. Ibid.=нечювъственниковъ.
29. Конш.=блюдутъ.
30. Р. Т. № 38 и Конш. и вытерти и выпаряти.
31. Конш.=гдѣ то живетъ.
32. Конш.=мило.
33. Ibid. и государю скоро.
34. Р. Т. № 38 и Конш.=государьскаго.
35. Ibid.=государю и государыни.
36. Ibid.=государи.
37. Конш.=тѣмъ.
38. Ibid.=дурному.
39. Ibid.=попущали.
40. Р. Т. № 1=нѣсть.
41. Ibid. государю.
42. Конш.=пѣтія.
43. Р. Т. № 38 и Конш.=лакамства.
44. Слѣдующаго мѣста нѣтъ въ Р. Т. № 38 и у Конш.
45. Цар. Пог. Арх. Бол.=апостолъ рече.
46. Ibid.=пищущу.
47. Ibid. се же есть дѣла Божія.
48. Здѣсь продолжается Р. Т. № 38 и Конш.
49. Конш.=Да чему самъ отъ государя наученъ, того бы и жены наказывали.
50. Р. Т. № 38=блядовали, № 1=бляли, далѣе слѣдуетъ въ Р. Т. № 38 пропускъ, Конш. бляла.
51. Пог. Арх. Бол. Цар. которыя.
52. Ibid.=много.
53. Ibid.=которыя.
54. Р. Т. № 1 твое.
55. Ibid.=они.
56. Р. Т. № 1 лучится. Арх. Пог. Болш. Цар. тишкомъ о каковомъ дѣлѣ.
57. Ibid. дѣвки и женки молодыя.
58. Р. Т. № 1 намъ.
59. Ibid.=молвитъ.
60. Арх. Пог. Цар. Бол.=то и то.
61. Р. Т. № 1 еще и.
62. Арх. Пог. Цар. Бол.=все.
63. Р. Т. № 1=что.
64. Арх. Пог. Цар. Бол.=рѣкше.
65. Ibid. дѣвками.
66. Этого мѣста нѣтъ ни въ одномъ спискѣ кромѣ Погод. № 4.
67. Прод. въ Арх. Цар. Пог. Бол.
68. Прод. въ Р. Т. № 1.
69. Прод. въ Р. Т. № 38 и у Конш.
70. Р. Т. № 38=таковихъ людеи.
71. Р. Т. № 38 и Конш. праведными труды № 1 и труды.
72. Р. Т. № 38 и Конш. мужеи, и женъ, и робятъ и всякихъ слугъ.
73. Р. Т. № 38 и Конш.=государи бы свою душу, и свои домъ строили, и домочадцевъ безъ всякія скорби, далѣе слѣдуетъ пропускъ.
74. Прод. Р. Т. № 38 и Конш.
75. Ibid. опять пропускъ.
76. Р. Т. № 1=недостаточествѣ.
77. Р. Т. № 1=аще ли имѣеши.
78. Р. Т. № 1=опечались своею нищетою.
79. Ibid.=Господне.
80. Р. Т. № 38=призывати.
81. Р. Т. № 38 и Конш. продолжается достоино отъ своихъ проведныхъ трудовъ и къ церквамъ божіимъ, и въ церковникомъ и въ монастыри приносити.
82. Р. Т. № 38=призывати.
83. Конш. ни отъ посулу, ни отъ поклепу, ни отъ резоимства.
84. Конш.=Богъ соблюдетъ.
85. Въ Р. Т. № 38 и Конш. этимъ оканчивается глава.
86. Арх. Пог. Цар. Бол. дворовыми.
87. Ibid.=единою.
88. Р. Т. № 1 Цар. Арх. Бол. Пог. въ недѣлю.
89. Р. Т. № 1=вся посты честныя.
90. Арх. Бол. Пог. Цар.=всѣ святые посты.