Св. Василия, Како подобает человеку быти/Поучение детям 1893 (ДО)

Материал из Викитеки — свободной библиотеки
Перейти к навигации Перейти к поиску
Yat-round-icon1.jpg

Поученіе дѣтямъ Владиміра Мономаха — Св. Василія, Како подобаетъ человѣку быти
авторъ Св. Василій
См. Оглавленіе. Изъ сборника «Поученіе дѣтямъ Владиміра Мономаха / Ред. и прим. В. А. Воскресенскаго — СПб.: Типографія и Литографія В. А. Тиханова, 1893.». Опубл.: 1893. Источникъ: Commons-logo.svg Владимир Мономах, С. М. Соловьёв и др. Поучение детям Владимира Мономаха. — СПб.: Типография и литография В. А. Тиханова, 1893.



[30]
5. Св. Василия, како подобаеть члвкоу быти.

1. Лѣпо есть члвкоу имѣти паче вьсего житія, да не прилежить имѣньи зѣло, нъ тѣлеси въздьржяніе, оудобрение норовоу, гласоу оумиление ї оудобрение; ѣдение и питие безъ говора, съ оудьржяніемь.

2. Предъ старьци мълчание, прѣдъ моудрыми послоушяние, съ тъчьныими любъвь имѣти, съ меньшими любъвьное съвѣщание.

3. Отъ плътьскыихъ и любосластьныихъ вештии бѣгати; мало глаголати, а множѣе разоумѣвати, не дьрзоу быти словъмь, ни прѣрѣковати въ людьхъ.

4. Не скоро въ смѣхъ въпадати; соромяживоу быти, долоу очи имѣти, а (душу) горѣ, не противоу отвѣщавати.

5. Послоушьливоу быти до съмьрти, троужятися до съмьрти, поминати присно страшьное и въторое прїшьствие и днь съмьртьныи.

6. О надежди радоватися, молитися непрѣстаньно, при вьсемъ Бога хвалити, (в)ъ скърбьхъ тьрпѣти, къ всѣмъ съмереноу быти, величяния бѣгати, говѣиноу быти. Блюсти срдце отъ помыслъ злыихъ, събирати имѣние на нбсьхъ, законъ хоронити, любити Бога вьсѣмъ срдцемъ и блїжьняго яко самъ ся. [31]

7. И самомоу ся испытати о помыслѣхъ и о дѣлѣхъ по вся дни.

8. Не оплитатися лихыми рѣчьми и не искати жития лѣнивыихъ, нъ тъкъмо подражяти (жити)я стыихъ отьць.

9. Радоватися съ исправльшими доброноровие и не завидѣти, съ стражюштиими страдати и съ плачюштиими зѣло плакатися.

10. Осоуженоу быти, неже осоудити, ниже поносити обраштяюштюся отъ грѣхъ.

11. Николи же себе правьдьна творити, нъ грѣшьника себе имѣти прѣдъ Богъмь и члвкы.

12. Оучити ненаказаныя, оувѣштати малодшьныя, слоужити больнымъ, ногы святыихъ оумывати.

13. Страньныихъ и братолюбьи прилежати, съ единовѣрьныими миръ имѣти.

14. Еретикъ члвкъ отъвраштятися, книгы прѣданыя почитати, а въ съкръвеныя отиноудь не приницяти.

15. О отьци и сынѣ и святѣмь доусѣ не пытати, нъ единосоуштьноу стоую троицю съ дрьзновениемь глаголати.

16. Крьштятися есть лѣпо, яко же[1] прияхомъ; и не клятися отиноудь, и не даяти сребра своего въ лихвоу, ни иного ничьсо же на оумножение пиштя[2].

17. Бѣгаи пияньства и отъ печалии жития сего, не бесѣдоуи лоуками, отиноудь ни о комъ же глаголати.

18. И ни како же послоушяти клеветания, нъ вьсе съ испытаниемь: никомоу же скоро яти вѣры.

19. Не томися гнѣвъмь, не быти дьржимоу похотью, не без оума гнѣватися на ближняго.

20. Слнце да не заидеть о гнѣвѣ вашемь, не дьржяти гнѣва ни на кого же. Не въздати зъла за зло, ни клеветы за клеветоу.

21. Нъ паче похоуленоу быти, неже хоулити; обидимоу быти, а не обидѣти, отъштетитися, а не отъштетити.

22. Паче же вьсего достоить члвкоу въздьржятися отъ бесѣдъ женьскыихъ и срамьныихъ словесъ: медъ… бо, иже ны отъвраштяють и съмысльныя.

23. Въ заповѣди не сътоужити си, нъ мьзды и похвалы отъ него чаяти и вѣчныя жизни желати и прияти. [32]

24. Имѣи Бога прѣдъ очима въиноу, и яко сыноу отъ вьсего срдця, и крѣпости, и разоума любити Бога, и яко рабоу боятися, соумьнѣти и слоужити емоу.

25. Страхъмь и трепетъмь спсение собѣ съдѣвати, дхъмь горѣти и тешти не лѣняштися, обълъченоу быти въ ороужие стааго дха.

26. И боротися съ врагомъ въ изнеможени плъти, и въ ниште­ тѣ дшя[3], и вьсе повелѣние творити, и непотрѣбьна себе глаголати; блгодарити Бога.

27. И ничьсо же съ завистью творити, и члвкъ оугождения бѣгаи, зане Богъ расыпа кости члкооугодьникъ, и не похвалитися отиноудь.

28. Ни похвалы себѣ глаголати, ні иномоу хваляштю послоушати; въ таинѣ вьсе творити, нъ тъкьмо отъ Бога хвалы и милости просити.

29. Помышляти прѣшьствие отъсоудоу, приготованая благая правьдьныимъ, — тако же оуготованыи огнь дияволоу и ангеломъ его.

30. По вьсемоу и апльское слово помьнѣти, яко недостоины страсти сего времене противоу боудоущимъ глаголатися въ насъ, и съ Двдъмь глаголати.

31. Храняштиимъ заповѣдї его въздание много, и вѣньци мнози правьдьныимъ, вѣчьнии крови, жизнь бес коньця, радость неизглаголаная отъ оця и сна и ста дха.

32. Съ цсри и пратриархы, съ прркы и аплы и моученикы, и съ всѣми оугождьшиими, съ ними же обрѣсти потштимся о Хѣ Иїсѣ Ги нашемь. Емоу же слава ныня и присно и въ вѣкы вѣкомъ.

Изъ Изборника Святослава, 1076 г.
Изв. X, стр. 431—434.

Примѣчанія[править]

  1. Въ текстѣ: не.
  2. Пиштя — род. ед. отъ пища.
  3. Дшя — род. ед. отъ доуша.


PD-icon.svg Это произведение перешло в общественное достояние в России и странах, где срок охраны авторского права действует 70 лет, или менее, согласно ст. 1281 ГК РФ.

Если произведение является переводом, или иным производным произведением, или создано в соавторстве, то срок действия исключительного авторского права истёк для всех авторов оригинала и перевода.