И нынѣ, скончавающе Исторію новоизбіенныхъ мучениковъ, да похвалимъ по силѣ нашей, елико можемъ. И кто бы, умъ здравъ имѣюще, возбранялъ ихъ похвалити? Развѣ бы кто гнуснаго, и лѣниваго, и лютаго, и неистоваго ума былъ. Речетъ кто: „негли мученики Царей нечестивыхъ, и идоломъ не послужили; и предъ лютыми мучители единаго Бога исповѣдали, и сего ради различныя муки претерпѣли и смерти строгія[1] подъяли, радующесь, за Христа Бога?“ Сіе воистинну и азъ вѣмъ; но и тѣ новоизбіенные отъ лютаго и безчеловѣчнаго Царя: аще онъ Богу мнится[2] и вѣровати и служити въ Троицѣ славиму, и крещеніемъ просвѣщенъ былъ; но Бога единаго и діаволи вѣдятъ, въ Троицѣ же славимаго, и Икономахи[3] и другіе мучители исповѣдали, но такожъ и тѣ множество мучениковъ и исповѣдниковъ прелютыми мученьми помучили за Христа: бо былъ крещенъ и Фока мучитель и Цесаремъ Римскимъ и Грецкимъ; но обаче, безчеловѣчія его ради, мучитель нареченъ есть. Азъ же реку нѣчто поистиннѣ дерзостнѣйше: положилъ бы нѣкто два драконы ядовитыхъ и видѣлъ ихъ единаго внѣ, а другаго внутрь: которагожъ бы удобнѣе было устрещися, внѣшняго или внутренняго? Ктобы прѣлъ,[4] иже внѣшняго! Тако Царіе быша прежніе мучители нечестивые идолослужители, болваномъ глухимъ и нѣмымъ жертву приносяше и бояшесь[5] тѣхъ боговъ новыхъ, ихъ же не подобаше боятися, пореченному: убояшесь страха, идѣже не бѣ страха, и быша оные церкви Христовы явственные и внѣшніе непріятели. Но новый нашъ, не внѣшній, но воистинну внутренній драконъ, не болваномъ служити повелѣлъ, а ни жертвы приносити имъ; но первѣе самъ самого діавола волю исполнилъ, возненавидѣлъ узкій и прискорбный путь, покаяніемъ ко спасенію приводящь, и потекъ съ радостію по широкому и пространному пути, водящему въ погибель, яко и самимъ намъ многажды слышащимъ ото устъ его: егда уже былъ развратился,[6] тогда во слухъ всѣмъ глаголалъ: „едино, рече, предъ себя взяти,[7] или здѣшнее или тамошнее!“ сирѣчь или Христовъ прискорбный путь, или сатанинъ широкій.
О безумный и окаянный! забылъ еси прежде себя Царей царствовавшихъ, и въ новомъ и въ ветхомъ Завѣтѣ, паче же прародителей твоихъ, Княжатъ Русскихъ святыхъ, ходящихъ[8] по Христову узкому пути, сирѣчь мѣрнѣ и воздержнѣ живущихъ; но обаче царствующихъ блаженнѣ, яко и ты самъ въ покаянію былъ немало лѣтъ и добрѣ царствовалъ. А нынѣ, егда развратился[9] еси и прельстился отъ ласкателей; тогда таковыя словеса отрыгнулъ еси, избравши себѣ пространный Антихристовъ путь, и отринулъ отъ себя всѣхъ предобрыхъ и разумныхъ мужей, и собравши войско діаволе, сирѣчь похлѣбниковъ, и отовсюду злодѣевъ, во всѣмъ согласующихъ злостемъ твоимъ, нарицающесь Церковникомъ, погналъ Церковь Божію.... и яко погналъ! и коль страшно и прелюто! иже рещи и выписати не возможно! (Яко напреди мало рѣхомъ, но обаче мало нѣчто и отчасти о томъ гоненію въ предреченныхъ изъявлено). Не нудилъ жертвы приносити болваномъ, но діаволомъ вкупѣ съ собою согласовати повелѣвалъ, трезвыхъ во піянствѣ погружатися нудилъ, отъ негоже всѣ злыя возрастаютъ; не Крону[10] жрети идѣти закалати, но отрекшись естества, сирѣчь отца и матери и братій, рѣзати человѣковъ по составомъ повелѣлъ, яко и Басманова Ѳеодора принудилъ отца убити, и Никиту безумнаго Прозоровскаго — Василія, брата своего, и другихъ многихъ: не предъ Афротидовымъ[11] болваномъ блудотворенія и нечистоты плодити, но на явственнѣйшихъ своихъ скверныхъ пированіяхъ пресквернѣйшіе глаголы со восклицаніемъ и со вопіяніемъ отрыгати: (а что по томъ послѣдовало, дѣлы исполняемыя скверности и нечистоты, сіе совѣсти ихъ пущаю лучше вѣдати); не въ Бахусову[12] звѣзду поставленному болвану піянствующе и безчинствующе, ни праздникъ его во едино время и въ годъ сіе творя; но весь цѣлый вѣкъ свой, — егда возненавидѣлъ воздержальное житіе, — тысящу кратъ горше, нежели оные поганы, Бахуса потитающе, піянствующе и безчинствующе, крови Христіанскія на проклятыхъ пированіяхъ проливающе нехотящихъ согласовати ему въ таковыхъ: яко единъ мужъ храбрый посреди пиру обличилъ его предо всѣми, емужъ было нареченіе Молчанъ Митновъ.[13] Егда нудимъ былъ отъ него предреченными оными великими, діаволу обѣщальными, чашами пити; тогда велегласно возопивша глаголютъ его и рекша: „О Царю! воистинну яко самъ піешъ, такъ и насъ принуждаешь окаянныхъ; медъ съ кровію смѣшанный братій нашихъ, правовѣрныхъ Христіанъ, пити!“ Онъ же, абіе возгорѣвся гнѣвомъ великимъ, копьемъ, еже во проклятомъ жезлѣ своемъ носяше, абіе рукою своею пробилъ его и внѣ храмины лютымъ Кромѣшникомъ повелѣлъ извлещи его, едва дышуща, и добити. И сице исполнилъ помостъ полаты кровію, посреди проклятаго пиру.210) Едали и сей мужъ не мученикъ, воистинну свѣтлый и знаменитый побѣдоносецъ!
Христіанскій, речешь, Царь? И еще православный, отвѣщаю ти: Христіановъ губилъ и отъ православныхъ человѣковъ рожденныхъ и ссущихъ младенцевъ не пощадилъ! Обѣщался, речешъ, Христу на крещеніи, отрекшися діавола и всѣхъ дѣлъ и всѣхъ ангелъ его? Реку ти паки: поправши заповѣди Христа своего и отвергшися законоположенія Евангельского, егда не явственно обѣщался діаволу и ангеломъ его, собравши воинство полковъ діавольскихъ и учинивши надъ ними Стратилаты окаянныхъ своихъ ласкателей, и вѣдый волю Царя небеснаго, произвелъ дѣломъ всю волю сатанинскую, показующе лютость неслыханную, никогда же бывшую въ Русіи, надъ церковью живаго Бога! Не боится, а ни ужасается новыхъ боговъ? Глаголю ти: аще не боится новыхъ, но боится чаровъ, сирѣчъ стараго и древняго Веліара, научившися и вѣдуще, иже знаменіемъ честнаго Креста всеужасіе[14] попирается и изгоняется. Къ тому, не яко ли у мучителей древнихъ различныя орудія мученій, такожъ и у нашего новаго? не сковрады ли и пещи? не бичеваніе ли жестокое и ногти острые?[15] не клещи ли разженныя,[16] торганія ради тѣлесъ человѣческихъ? не иголъ ли за ногти біеніе и рѣзаніе по составомъ? не претренія ли вервми наполы не токмо мужей, но и женъ благородныхъ, и другіе безчисленные и неслыханные роды мукъ, на неповинныхъ произведенные отъ него?… Еще ли не мучитель прелютый!…211)
Окаянные и вселукавые пагубники отечества, и тѣлесоядцы, и кровопивцы сродникъ своихъ и единоязычныхъ! поколь маете[17] безстудствовати и оправдати такаго человѣко-разтерзателя? О преблаженные и достохвальные святые мученики новоизбіенные отъ внутренняго змія! за добрую совѣстъ вашу пострадасте, и мало здѣ претерпѣвше и очистившеся прехвальнымъ симъ крещеніемъ, чисти къ пречистѣйшему Христу отойдосте мзды трудовъ воспріяти! Едали тѣ много не потрудишася? едали тѣ не добрѣ страдаша, не токмо Христіанъ убогихъ отъ варваровъ въ землѣ своей оброняюще, но и Царства кровопивственныя Бусурманскія цѣлыя мужествомъ храбрости своея разориша и съ самими Цари ихъ безвѣрными, и предѣлы разшириша Царства Христіанскаго ажъ до Каспійскаго моря и окрестъ, и грады тамо Христіанскіе поставиша, и святые олтари воздвигоша и многихъ невѣрныхъ къ вѣрѣ приведоша?
И что возглаголю о распространенію границъ на другія страны, служаще Цареви своему и общей вещи Христіанской вѣрнѣ, и яковую мзду здѣ получиша отъ того лютаго и безчеловѣчнаго Царя! Едали Христосъ не воздастъ имъ и не украситъ вѣнцы мученическими таковыхъ, яже обѣщалъ и за чашу студеныя воды отдати мзду? А сего ради, воистинну, будутъ ѣздити или плавати на облацѣхъ во срѣтеніе Господне въ первомъ воскресенію, яко рече Богословъ въ Апокалипсисѣ: блаженъ, рече, иже получитъ часть въ первомъ воскресенію, и Павелъ:[18] яко бо о Адамѣ всѣ умираютъ, тако и о Христѣ всѣ оживутъ; койждо во своемь чину: начатокъ Христосъ, сирѣчь пострадавшихъ: воскресе первый въ нетлѣнномъ тѣлеси, Начальникъ воскресенію за него пострадавшихъ; потомъ Христу вѣровавшіе во пришествіе его, сирѣчь во второе, егда со Ангелы явится, потомъ кончина, сирѣчь Антихристово убіеніе и общее всѣхъ воскресеніе. „Тогда, рече Соломонъ, станетъ во дерзновеніи мнозѣ праведникъ предъ лицемъ мучителя,“ рекше, очевистѣ съ мучившимъ его, або со обидѣвшимъ; тогда глаголю, и тѣ послѣдніе мученики, со древними страстотерпцы и побѣдоносцы, встрѣтятъ Христа своего, посреди аера отъ превыспреннихъ небесъ грядущаго со всѣми Ангелы своими, на избавленіе ихъ: онижъ отъ земли многими и великими полки, яко небопарный Павелъ глаголетъ, восхищены будутъ на облацѣхъ во срѣтеніе Господне на воздусѣ, и тамо всегда съ Господемъ будутъ. Ихъ же и насъ да сподобитъ, по премногой благодати своей, а не по нашимъ дѣламъ, Господь нашъ Іисусъ Христосъ, истинный Богъ, емужъ слава со безначальнымъ Отцемъ и со пресвятымъ и благимъ и животворящимъ Святымъ Духомъ, нынѣ и присно и во вѣки вѣковъ. Аминь.
Примѣчанія
[править]- ↑ Въ Б. срогны; на полѣ и въ Э. жестокія.
- ↑ Въ Р. и Э. мнится; въ Б. молится.
- ↑ Въ П. Б. и Р. на полѣ; иконоборцы.
- ↑ Въ Э. препрѣлъ (спорилъ бы).
- ↑ Такъ въ проч. сп. въ П. ибо аще.
- ↑ Въ Р. развратился; въ Б. возвратился.
- ↑ Въ Б. взято.
- ↑ Такъ въ проч. сп. въ П. родящихъ.
- ↑ Въ Р. развратился; въ Б. возвратился.
- ↑ Сатурну.
- ↑ Предъ Венеринымъ.
- ↑ Въ Э. Діонисову; такъ же и въ П. на полѣ.
- ↑ Въ Р. Молчальниковъ; въ Б. Молчанъ Митковъ.
- ↑ Въ Э. ужасіе; въ Б. все ужасне.
- ↑ Въ Б. остоортые.
- ↑ Изъ Э. въ Б. рожденные; въ П. и Р. рождеженные.
- ↑ Въ Э. имате; въ П. на полѣ: имѣете.
- ↑ Послан. къ Корин. 1. гл. 15